नेपाल पूर्वाधार 
काठमाडौं । बुटवल पावर कम्पनी (बिपिसी) ले स्याङ्जामा सञ्चालन गरिरहेको ९.४ मेगावाटको आँधीखोला जलविद्युत केन्द्रको स्थानीय क्षेत्रमा वितरण हुँदै आएको विद्युतको नयाँ महसुल दर निर्धारण गर्न शुक्रबार (बैशाख १४ गते) सार्वजनिक सुनुवाई हुने भएको छ । विद्युत नियमन आयोगले बिपिसीले नै आफैँ उत्पादन गरी जिल्लामा वितरण गर्दै आएको विद्युतको नयाँ महसुल निर्धारण गर्न गरेको प्रस्तावित दरका सम्बन्धमा सम्बन्धि सरोकारवालासँग सार्वजनिक सुनुवाई गर्न लागेको हो ।
आयोग ऐन, २०७४ को दफा २१ र नियमावली, २०७५ को नियम १९ बमोजिम सम्बन्धित सरोकारवालाहरूसँग राय, सुझाव तथा प्रतिक्रिया लिनका लागि सार्वजनिक सुनुवाई आयोजना गर्न लागेको आयोगले जनाएको छ ।
आयोगका अनुसार सार्वजनिक सुनुवाई कार्यक्रम स्याङ्जाको पुतलीबजारस्थित सिटी हलमा दिउँसो १ देखि ३ बजेसम्म हुनेछ ।आयोगले बिपिसीले प्रस्ताव गरेको विद्युत महसुल दरका सम्बन्धमा राय, सुझाव तथा प्रतिक्रिया दिनका लागि सार्वजनिक कार्यक्रममा उपस्थित हुन सबै सरोकारवाला समक्ष अनुरोध गरेको छ ।
बिपिसीले आँधीखाेला वितरण केन्द्रकाे विद्युत सेवा उपयाेग गर्ने सबै वर्गका ग्राहकका लागि विद्युत महसुल बढाएर समायाेजन गर्न आयाेग समक्ष प्रस्ताव गरेकाे छ । आयाेगले सार्वजनिक सुनुवाइपछि नै सराेकारवालाकाे राय, सुझाव तथा प्रतिक्रियाका आधारमा आँधीखाेलाकाे नयाँ विद्युत महसुल दर निर्धारण गर्नेछ ।
बिपिसीले स्याङ्जा तथा प्युठानमा सञ्चालित आँधीखाेला र झिम्ररुक जलविद्युत केन्द्रले उत्पादन गर्ने विद्युत आफैँ स्थानीय क्षेत्रमा वितरण गर्दै आएकाे छ । खपत हुन नसकेर बढी भएकाे विद्युत मात्रै नेपाल विद्युत प्राधिकरणकाे प्रसारण प्रणालीमा जाेडिने गरेकाे छ ।
