Nepal Purbadhar

शुक्रबार, जेष्ठ ११, २०८१
Friday, May 24, 2024

शुक्रबार, जेष्ठ ११, २०८१
Friday, May 24, 2024

नागढुंगा-सिस्नेखोला सुरुङमार्ग छेडियाे,गाडी गुड्न अझै १ वर्ष लाग्ने


काठमाडौं । नागढुंगा-सिस्नेखोला परियोजनाकाे सुरुङमार्ग छेडिएकाे (ब्रेक थ्रू) छ । परियाेजनाकाे २.६६७ किलाेमिटर लामाे मुख्य सुरुङमार्ग साेमबार छेडिएकाे हाे ।

साेमबार सुरुङभित्रै औपचारिक कार्यक्रम गरेर ब्रेक थ्रु गरिएकाे छ । प्रधानमन्त्री पुष्पकमल दाहाल, भाैतिक पूर्वाधार तथा यातायात मन्त्री रघुविर महासेठलगायतकाे उपस्थितिमा सुरुङमार्ग छिचाेलिएकाे नागढुङ्गा सुरुङ निर्माण परियोजनाका उपनिर्देशक गोविन्द दुमरुले बताए ।

प्रधानमन्त्री दाहालले स्वीच थिचेर सुरुङमार्ग छेडिएकाे घाेषणा गरे । प्रधानमन्त्रीले स्वीच थिचेपछि धादिङ र काठमाडौँ दुवैतर्फबाट खनिएको सुरुङ एकआपसमा छिचोलिएको हो । धादिङको सिस्नेखोला र काठमाडौँको चन्द्रागिरि नगरपालिका–१ मा रहेको टोटीपाखामा सुरुङ जोडिएको छ ।

दुमरुका अनुसार छेडिएकाे सुरुङमार्गकाे  कंक्रिटिङ, लाइटिङ लगायतका काम सम्पन्न गरेर गाडी गुड्ने चरणमा पुर्याउन अझै एक वर्ष लाग्नेछ । चन्द्रागिरि नगरपालिकाको बलम्बुदेखि धादिङको सिस्नेखोला जोड्ने यो सुरुङमार्ग परियाेजनाको मुख्य सुरुङको लम्बाइ २.६६७ किलाेमिटर छ ।

परियाेजनाकाे उद्धार सुरुङ (रेस्क्यु टनेल) भने गत साउनमै ब्रेक थ्रू भइसकेको छ । परियाेजनाकाे निर्माणको सुरुवाती सम्झौताअनुसार काम सुरु भएको ४२ महिनाभित्र अर्थात् गत वर्ष बैशाखमै निर्माण सम्पन्न भइसक्नुपर्ने तालिका थियाे । तर, विविध कारणले बल्ल सुरुङमार्ग छेडिएकाे हाे ।

याे परियाेजनामा तीनवटा अन्डरपास, चारवटा बक्स कल्भर्ट, एउटा ओभरपास, तीनवटा पुल (ब्रिज) र एउटा फ्लाइओभर रहेका छन् । बलम्बु क्षेत्रमा फ्लाइओभर निर्माणाधीन छ ।

त्यस्तै, सुरुङमार्गभित्रको सडक ढलान, बत्ती जडान (लाइटिङ), अक्सिजन पाइप जडान (भेन्टिलेसन)लगायतका काम बाँकी  छ । सुरुङमार्ग निर्माण सम्पन्न भइ सञ्चालनमा आउँदा काडमाडाैंकाे बलम्बुदेखि  धादिङकाे सिन्नेखाेला ३ मिनेटमै पुग्ने जनाइएकाे छ ।


Read Previous

अवैध क्रसरले पिखुवाको पक्की पुल जोखिममा   

Read Next

डेडिकेटेड फिडर र ट्रंक लाइन महसुल प्रकरण : आयोगका सदस्यबाट शपथ ग्रहण

Leave a Reply

Your email address will not be published.