नेपाल पूर्वाधार 
काठमाडौं । यो वर्ष विश्व बजारमा स्मार्टफोनको बिक्री एक दशकयताकै खराब रहने देखिएको छ । बजार अनुसन्धानकर्ता संस्था काउन्टरप्वाइन्ट रिसर्चले गरेको एउटा सर्वेक्षणले यस्तो देखाएको हो । अमेरिका र चीनमा स्मार्टफोनको किनबेच सुस्ताएपछि समग्रमा विश्वव्यापी विक्री प्रभावित हुने क्रममा छ ।
काउन्टरप्वाइन्टका अनुसार सन् २०२३ मा विश्वभर १ अर्ब १५ करोड थान डिभाइस विक्री हुनेछ । विक्रीको यो आकार एक वर्ष अघिको भन्दा ६ प्रतिशत कम हो । वर्षको शुरुमा चीनको स्मार्टफोन बजारमा चहलपहल बढेको भएपनि पछिल्लो समय अवस्था आशाजनक छैन । वर्षेनी बढीमा औसत ४५ करोड थान स्मार्टफोन बिक्ने गरेको चीनमा विक्री घटेर औसत २७ करोड थानमा झरेको छ ।
रोजगारी बजार मजबुत रहेको अनि महँगी घटिरहेको भएपनि उपभोक्ताहरु आफ्नो पुरानो फोन फेर्न खासै उत्साहित छैनन् । जसले गर्दा अमेरिका र विश्वभर नै फोन फेरिने अवधि बढिरहेको छ । प्रिमियम तथा अल्ट्रा प्रिमियम स्मार्टफोनको मागमा बढ्दा अन्य प्रतिस्पर्धी कम्पनीहरुको तुलनामा एप्पलको आइफोनको बिक्रीदरमा लोभलाग्दो वृद्धि हुने आशा गरिएको छ । एजेन्सी
