नेपाल पूर्वाधार 
ललितपुर । नेपालको दिगो भविष्यका लागि बलियो नीति निर्माणको महत्वमा विज्ञहरुले जोड दिएका छन् । कार्यक्रममा ऊर्जा, जलस्रोत तथा सिँचाइ मन्त्री शक्तिबहादुर बस्नेतले कार्बन तटस्थता र सामाजिक–आर्थिक समृद्धितर्फको मुलुकको यात्राका लागि प्रभावकारी नीतिहरू कार्यान्वयन गर्नुपर्नेमा जोड दिए ।
जलस्रोत मन्त्रालयका पूर्व राज्यमन्त्री डिना उपाध्यायले पहलको प्रशंसा गर्दै बृहत् ऊर्जा बहसको आवश्यकतामा जोड दिइन् । नेपालस्थित नर्वेजियन दूतावासका ऊर्जा र जलवायु काउन्सिलर जन एरिक स्टडस्रोडले सम्भावित प्रविधि हस्तान्तरण र दिगो नवीकरणीय ऊर्जा नीतिहरूमा आफ्नो अन्तरदृष्टि साझा गरे ।
गोष्ठीका सह–अध्यक्ष ब्रिजेश अधिकारी र एसोसिएशनका डीनले अतिथिलाई स्वागत गरे । कार्यक्रममा हितेन्द्रदेव शाक्य, लीला देवी गड्तौला आबिद हुसेन लगायत ऊर्जासँग सम्बन्धित विभिन्न विषयहरूमा बोलेका थिए । ऊर्जा नीति र पूर्वाधार विकाससम्बन्धी प्यानल छलफलमा शिक्षा, उद्योग र ऊर्जा नीतिलगायत विविध पृष्ठभूमिका विज्ञहरू सहभागी थिए ।
सिम्पोजियमका सहअध्यक्ष तथा कुसोलका डीन प्रा. डा. ऋषिकेश वाग्लेले समापन मन्तव्यमा ग्रिडभिल काठमाडौं विश्वविद्यालय, इनर्जी नेपाल, इसिमोड, काठमाडौं विश्वविद्यालय स्कूल अफ ल र सीइटीआरएफको सफल आयोजनाको संयुक्त प्रयासलाई महत्वपूर्ण भएको उल्लेख गरे ।
कार्यक्रमले नेपालको नवीकरणीय ऊर्जा संक्रमणको लागि महत्वपूर्ण राष्ट्रिय नीति, हस्तक्षेप र स्थानीय र क्षेत्रीय सहयोगको मूल्यांकन गर्न मञ्च प्रदान गरेको थियो । नेपालको दीर्घकालीन रणनीतिसँग मिल्दोजुल्दो दिगो नवीकरणीय ऊर्जा नीति सिफारिसमा योगदान पुर्याउने लक्ष्य राखेर गोष्ठी सम्पन्न भएको थियो ।
उक्त गोष्ठी ग्रिडभिल काठमाडौं युनिभर्सिटी र एनजाइज नेपाल, इसिमोड, काठमाडौं युनिभर्सिटी स्कुल अफ ल र सीइटीआरएफको सहकार्यमा आयोजना गरेको हो ।
