नेपाल पूर्वाधार 
काठमाडौं । जिल्ला प्रशासन कार्यालय परासीले २२० केभी न्यू बुटवल–बर्दघाट प्रसारण लाइनको रुटको क्षेत्राधिकार (राइट अफ वे) भित्र पर्ने जग्गाको क्षतिपूर्ति यकिन गर्न सम्बन्धित जग्गाधनीलाई बोलाएको छ । प्रशासन कार्यालयले शुक्रबार सूचना प्रकाशित गरी ७ दिनभित्र प्रसारण लाइनको रुटको जग्गाको क्षतिपूर्ति यकिन गर्न आउन जग्गाधनीलाई आग्रह गरेको हो ।
सुनवल नगरपालिकाको वडा नम्बर–१३ (साबिक रामनगर–२ घ र रामनगर–१ क) मा अवस्थित सबस्टेसनदेखि उत्तरतर्फ पर्ने प्रसारण लाइनको टावरको मध्य रेखाबाट दायाँ–बायाँ १५/१५ मिटर राइट अफ वे भित्र पर्ने जग्गाको यकिन गर्न सम्बन्धित जग्गा धनीले जिल्ला प्रशासन वा प्रसारण लाइन आयोजनाको कार्यालयमा आवेदन दिनुपर्ने सूचनामा भनिएको छ ।
जग्गाको क्षतिपूर्ति दावी गर्न आउने सम्बन्धित जग्गा धनीले आफ्नो कहदैया, जग्गाधनी प्रमाणपत्रको प्रतिलिपि तथा सम्बन्धित स्थानीय निकायको रिफारिस सहित ७ दिनभित्र आवेदन दिनु पर्ने पनि सूचनामा उल्लेख छ ।
सूचना प्रकाशित भइसकेपछि प्रसारण लाइनको रुट पर्ने ३० मिटर क्षेत्राधिकारभित्र अग्ला भौतिक संरचना निर्माण नगर्न तथा रुख विरुवा रोप्न पनि नपाइने जिल्ला प्रशासन कार्यालयले जनाएको छ । नेपाल विद्युत प्राधिकरणले तराई क्षेत्रको प्रसारण प्रणाली सुधार गर्न २० किलोमिटर लामो यो प्रसारण लाइन निर्माण गरिरहेको छ ।
