नेपाल पूर्वाधार 
काठमाडौं । मंगलबार भौतिक पूर्वाधार तथा यातायात मन्त्रालय, यातायात मजदुर तथा अन्य सरोकारवालाको बैंठकले यातायात हड्ताल फिर्ता लिने निर्णय गरेको छ ।
उपप्रधान मन्त्री तथा भौतिक पूर्वाधार तथा यातायात मन्त्री नारायणकाजी श्रेष्ठको नेतृत्वमा बसेको बैठकले यातायात क्षेत्रमा रहेका समस्या र अवस्थाको बारेमा सुझाव दिनेगरी गठन भएको उच्चस्तरीय यातायात सुधार कार्यदलको प्रतिवेदन प्राप्त नहुञ्जेलसम्मको लागि हड्ताल फिर्ताको निर्णय भएको हो ।
यातायात मजदुरहरुले प्रतिवेदन प्राप्त नहुन्जेलसम्म यसअघि आव्हान गरेका सबै कार्यक्रम स्थगन गर्ने निर्णय गरेका छन् ।
भौतिक पूर्वाधार तथा यातायात मन्त्रालयले गत माघ २९ गते गठित यातायात सुधार कार्यदलको प्रतिवेदन प्राप्त नहुन्जेलसम्म यातायात सूचारु सञ्चालन गर्ने निर्णय गरेको हो ।
त्यस्तै, कार्यदल बैठकमा यातायातसँग सरोकार राख्ने सबै सम्बद्ध पक्षसँग छलफल गरि सुझाव लिने निर्णय गरेको छ । कार्यदलमा सरोकारवाला सम्बद्ध महासंघ, संघ र संगठनका प्रतिनिधिहरुलाई आवश्यकता अनुसार आमन्त्रण गर्ने निर्णय भएको छ ।
दोषीलाई कार्वाही र निर्दोषलाई तत्काल रिहाई गर्ने निर्णय
बैंठकले काठमाडौंस्थित गोंगबु नयाँ बसपार्कमा मजदुरहरुले गरेको कार्यक्रममा तोडफोड र लुटपाट तथा आक्रमणमा संलग्न दोषीलाई कारबाही गर्ने निर्णय गरेको छ ।
त्यस्तै, काठमाडौँ महानगरपालिका र ल्होत्से बहुउद्देश्यीयबीच गोंगबुस्थित नयाँ बसपार्कको लागि भएको सम्झौताका सम्बन्धमा काठमाडौं महानगरपालिकाबाट प्राप्त प्रतिवेदन अध्ययन गर्ने, काठमाडौं महानगरपालिकाले यसको अनुगमन गर्ने साथै कम्पनी, महानगरपालिका र सम्बद्ध मजदुर संघसंगठनहरु र यातायात व्यवसायी महासंघहरुबीच छलफल गर्ने र यसको संयोजन भौतिक पूर्वाधार मन्त्रालयले गर्ने निर्णय गरिएको छ ।
