नेपाल पूर्वाधार 
काठमाडौं । नेपाल विद्युत प्राधिकरणले मोहन गौतमलाई अप्पर तामाकोसी हाइड्रोपावर कम्पनीको प्रमुख कार्यकारी अधिकृतको जिम्मेवारी दिएको छ । प्राधिकरण सञ्चालक समितिको गत पुस १२ गतेको बैठकले निर्णय गरी विज्ञानप्रसाद श्रेष्ठको कार्यावधि पूरा भई रिक्त रहेको उक्त स्थानको पदपूर्ति गर्न गौतमलाई तामाकोसीको प्रमुख कार्यकारी अधिकृतको जिम्मेवारी दिएको हो ।
कम्पनीले प्रवर्द्धन गरेको ४५६ मेगावाटको माथिल्लो तामाकोसी जलविद्युत आयोजनाको अध्ययन तथा ‘सिभिल वर्क्स कन्ट्र्याक्ट म्यानेजर’ को जिम्मेवारीमा रही पहिले पनि काम गरेका गौतमलाई अहिले फेरि कार्यकारी प्रमुख जिम्मेवारी दिइएको हो । गौतमले मंगलबार पदभार ग्रहण गरी कार्यालयमा हाजिर गरेका छन् । कम्पनीको सञ्चालक समितिबाट भने गौतमलाई प्रमुख कार्यकारी अधिकृत बनाउनेबारे निर्णय हुन बाँकी छ ।
उनले यसअघि माथिल्लो तामाकोसीमा सिभिल वर्क्स कन्ट्र्याक्ट म्यानेजर भई २०६४ देखि २०२ साल (सन् २००८ देखि सन् २०१५ ) सम्म गरी करिब ६ वर्ष ११ महिना काम गरेका थिए । उनी यो अवधिमा आयोजनाको सिभिलतर्फको ठेक्का सम्झौताका लागि कागजात तयार गर्नेदेखि ठेक्का आह्वान गर्ने प्रक्रियामा सहभागी भए ।
योभन्दा अघि पनि २०६० सालमा खुल्ला प्रतिश्पर्धाबाट विद्युत प्राधिकरणमा ७ तहमा नाम निस्किएपछि सिभिल इन्जिनियरकोरूपमा उनी माथिल्लो तामाकोसी आयोजनाको अध्ययन कार्यका लागि काजमा खटिएका थिए ।
तामाकोसीको प्रमुख कार्यकारी अधिकृतको जिम्मेवारीमा आउनुअघि उनी त्रिशूली जलविद्युत कम्पनीको प्रबन्ध सञ्चालकको जिम्मेवारीमा थिए । यो कम्पनीले प्रवर्द्धन गरेको ३७ मेगावाटको त्रिशूली–३ ‘बी’ जलविद्युत आयोजना निर्माणाधीन छ ।
२०७३ साल साउनमा त्रिशूली गएका उनले त्यहाँ रहँदा त्रिशूली–३ ‘बी काे डिजाइन तयार पार्नेदेखि ‘विडिङ डकुमेन्ट’ तयार गर्ने तथा ठेक्का आह्वान गर्नेसम्मको सम्पूर्ण कार्य सम्पन्न गरी आयोजनालाई निर्माणको चरणमा पुर्याए । अहिले आयोजनाको ६५ प्रतिशत निर्माण सकिएपछि उनी त्यहाँबाट तामाकोसीमा सरुवा भएका हुन् ।
विद्युत प्राधिकरणमा स्वच्छ छवि बनाएका गौतमले मस्को स्टेट अटोमोबाइल एण्ड रोड टेक्निकल इन्स्टिच्युटबाट सिभिल इन्जिनियरिङ गरेका छन् । अध्ययन पूरा गरेपछि उनले पहिलो पटक बुटवल पावर कम्पनी (बिपिसी) बाट आफ्नो इन्जिनियरिङ करियरको सुरुवात गरेका थिए ।
बिपिसीमा रहँदा उनले नर्वेजियन लगानीमा निर्माण भएको ६० मेगावाटको खिम्ती जलविद्युत आयोजनासँग जोडिएर काम गरे । बिपिसीमा सिनियर इन्जिनियरकोरूपमा ५ वर्ष १ महिना (सन् १९९८–२००३) काम गरेपछि मात्रै उनले विद्युत प्राधिकरणमा खुल्ला प्रतिश्पर्धामार्फत छनोट भई ७ तहबाट सेवा सुरु गरेका थिए ।
२०६० सालमा प्राधिकरणमा ७ तहमा नाम निकालेका गौतम त्यसको एक वर्षमै २०६१ सालमा पुनः ८ तह नाम निकाल्न सफल भए । ९ तहमा पनि उनले खुल्ला प्रतिश्पर्धाबाटै नाम निकाएका थिए ।
उनले दूधकोसी जलाशय जलविद्युत आयोजनामा पनि आयोजना प्रमुख भई काम गरेका छन् । २०७२ मा दूधकोसीमा सरुवा भएका उनले त्यहाँ रहँदा आयोजनाका लागि विदेशी परामर्शदाता नियुक्त गर्ने कार्यमा संलग्न भएका थिए । उनी दूधकोसीमा रहँदा छनोट भएको परामर्शदाताले नै अहिले काम गरिरहेको छ ।
