नेपाल पूर्वाधार 
काठमाडौं । नेपाल विद्युत प्राधिकरणले अटेर गर्ने सेवा प्रदायकको विद्युतीय पोलमा झुन्डिएको अव्यवस्थित तार तथा उपकरण आफैँ हटाउन सुरु गरेको हो । प्राधिकरणले पटक–पटक सूचना जारी गरी आग्रह गर्दा समेत अटेर गरेपछि सोमबारबाट सहर नै कुरुप हुने गरी विद्युतीय पोलमा झुन्ड्याइएका इन्टरनेट, टेलिफोन तथा केबल टेलिभिजनका तार आफैँ हटाउन सुरु गरेको हो ।
पहिलो चरणमा त्रिपुरेश्वर–सुन्धारा–रत्नपार्क–केशरमहल–लैनचौर–लाजिम्पाट–नारायण गोपालचोक–बूढानीलकण्ठ खण्डको अव्यवस्थित तार र उपकरण हटाउन सुरु गरेको प्राधिकरण वितरण तथा ग्राहक सेवा निर्देशनालयले जनाएको छ । निर्देशनालयका अनुसार प्राधिकरण ऐन, २०४१ को दफा १९ (ख) र १९ (छ) बमोजिम विद्युतीय पोलमा झुन्ड्याइएका अव्वस्थित तार अटाउन सुरु गरिएको हो । निर्देशनालयले सोमबार सार्वजनिक सूचनामार्फत अब जथाभावीरूपमा झुन्ड्याइएका सेवा प्रदायकका तारहरू हटाउन सुरु गरेको जानकारी समेत सेवा प्रदायकलाई गराएको छ ।
विद्युतीय पोल प्रयोग गरी अव्यवस्थित तरिकाले तानिएको र प्रयोगमा नरहेका अनावश्यक अप्टिकल फाइबर केबल एवं एक्सियल केबल तथा पोलमा जथाभावी झुण्ड्याइएका उपकरणहरू अब हटाइरहेको प्राधिकरणले जनाएको छ । साथ,ै जथाभावी झुन्ड्याइएका तार पोलबाट हटाउँदा हुन सक्ने नोक्सानीको लागि आफु जिम्मेवार नहुने समेत प्राधिकरणले स्पष्ट पारेको छ ।
प्राधिकरणले यसअघि गत कात्तिक १५ गते ४५ दिनभित्र तथा मंसिर १८ गते ७ दिनभित्र तार तथा उपकरण व्यवस्थित गर्न सूचना जारी गरी ताकेता गरेको थियो । तर, यो अवधिमा कुनै सेवा प्रदायकले सूचना बमोजिम तार तथा उपकरण व्यवस्थित नगरेपछि प्राधिकरण आफैँ हटाउने निर्णयमा पुगेको हो ।
सेवाप्रदायकले विद्युतीय पोलमा अव्यवस्थितरूपमा तार झुन्ड्याउँदा पोल कुरुप देखिनुका साथै दुर्घटनाको जोखिम पनि बढाएको छ । उपत्यकाको वितरण प्रणाली भूमिगत बनाउँदा मात्रै विद्युतीय पोलमा झुन्डिएका तार तथा केबल दीर्घकालीनरूपमा हटाउन सम्भव हुने देखिन्छ ।
