नेपाल पूर्वाधार 
काठमाडौं । एशियाली विकास बैंकले नेपालको शिक्षा प्रणालीलाई सुद्धढीकरणको लागि मंगलबार करिब २६ अर्ब ३० करोड रुपैयाँ (२ सय मिलियन अमेरिकी डलर) सहुलियत ऋण सहयोग गर्ने निर्णय गरेको छ । सहयोग रकम विद्यालय शिक्षालाई गुणस्तर, समानता र उत्थानशील बनाउन खर्च गरिनेछ ।
सरकारको विद्यालय शिक्षा क्षेत्र योजना २०२१–२०३० को पहिलो ५ वर्षे कार्यक्रम कार्यान्वयनलाई सघाउनेछ । यस योजनालाई अन्य ७ वटा विकास साझेदारले पनि सघाएका छन् । सहयोगले आधारभूत र माध्यमिक विद्यालयहरुको सिकाइ र शिक्षणलाई सुधार ल्याउनेछ ।
कोभिड १९ को कारण विद्यालयक शिक्षाको सिकाइमा भएको हानीलाई सुधार्न र स्थानीय तहमा रहेका विद्यालयको शिक्षा योजना, अनुगमन र प्रतिवेदन तयार गर्ने क्षमता वृद्धि गर्न सघाउनेछ ।
‘नेपालले शिक्षाको पहुँच वृद्धि गर्न उल्लेखनीय काम गरिरहेको र अझै बाँकी रहेका कामलाई सम्बोधन गर्न आवश्यक रहेको एडिबीको दक्षिण एशियाको सामाजिक क्षेत्र हेर्ने विशेषज्ञ रुडी भान डेलले भने । ‘यो सहयोगले सुधारलाई गति दिन र शिक्षा प्रणालीमार्फत मानव पुँजीको विकास गर्न, असमानता घटाउन र दीगो वृद्धि हासिल गर्न सहयोग पुग्नेछ’ उनले भने ।
विशेषगरी छात्राहरुको लागि कक्षा ११ र १२ मा विज्ञान विषय अध्ययन गर्ने अवसरहरुलाई बढाउन छनौट गरिएको माध्यमिक विद्यालयहरुको स्तरोन्नति गरिनेछ ।
गरिब विद्यार्थीलाई दिइने छात्रवृत्ति योजनालाई सुधार गरी कक्षा ९ देखि १२ सम्म दिने गरिएकोमा कक्षा ६ देखि १२ सम्म दिने गरी विस्तार गरिनेछ ।
