नेपाल पूर्वाधार 
काठमाडौं । यातायात व्यवस्था विभागले विद्युतीय सवारी चालक अनुमतिपत्र (स्मार्ट कार्ड) छाप्न प्रयोग गरिने मास प्रिन्टर आपूर्तिको लागि सोमबार बोलपत्र आब्हान गरेको छ ।
मास प्रिण्टर आपूर्ति बाहेक विभागले तोकेको ठाउँसम्म डेलिभरी, स्थापना, एकीकरण र कमिसनिङ (सञ्चालन) को लागि समेत बोलपत्र आब्हान गरेको हो । विभागले योग्य बोलपत्रदाताहरूबाट इलेक्ट्रोनिक बोलपत्र आह्वान गरेको छ ।
मास प्रिण्टर उपलब्ध गराउनको लागि छनौट भइ सम्झौता भएको बोलपत्रदाताले ९० दिनभित्र मास प्रिण्टर उपलब्ध गराइसक्नुपर्नेछ ।
बोलपत्रमा भाग लिनको लागि बढीमा तीन वटा कम्पनीले संयुक्त उपक्रम (ज्वाइण्ट भेञ्चर) गर्न पाउनेछन । अहिले विभागसँग एउटा मास प्रिण्टर छ । थप एउटा मास प्रिण्टरको लागि यो बोलपत्र आब्हान गरेको हो ।
विभागले खरिद गरेको मास प्रिण्टर १० वर्षसम्म सञ्चालन गर्ने लक्ष्य राखेको छ ।
यस बोलपत्रमा माग लिनको लागि ई–जीपी प्रणाली सञ्चालन मार्गनिर्देशन २०७४ अनुसार बोलपत्रदाताले आफ्नो बोलपत्र विद्युतीय रूपमा पेश गर्नुपर्नेछ ।
प्रि–बिड बैठक यातायात व्यवस्था विभाग मिनभवन, काठमाडौंमा मंसिर १३ दिउसो १ बजे बस्नेछ ।
विभाग अनुसार विद्युतीय बोलपत्र सार्वजकि खरिद अनुगमन कार्यालय को ई–जीपी प्रणाली मार्फत यातायात व्यवस्था विभागको कार्यालय, मीनभवनमा पेश गर्नुपर्नेछ ।
