नेपाल पूर्वाधार 
मकवानपुर । ३ महिनादेखि बन्द रहेको हेटौंडा सिमेन्ट उद्योगमा क्लिङ्कर उत्पादन सुचारु भएको छ । भट्टीमा लाग्ने कोइलाको आपूर्ति भएपछि मंगलबारबाट सिमेन्ट उद्याेग सञ्चालनमा आएकाे हाे ।
उद्योगलाई चाहिने गुणस्तरीय कोइला बोलपत्रमार्फत भारत, भुटान, इन्डोनेसियालगायत अन्य देशबाट आपूर्ति गरी उत्पादन सुचारु गरिएकाे सिमेन्ट उद्योग व्यवस्थापनले जनाएको छ । अहिले उद्याेगमा १४ हजार म्याट्रिक टन कोइला आपूर्ति भइरहेको हेटौंडा सिमेन्ट उद्योगका नायब महाप्रबन्धक नवीनकुमार कर्णले जानकारी दिए ।
केही महिनादेखि आर्थिक अभावको कारणबाट समयमै कोइला आपूर्ति हुन नसकेपछि उद्याेगकाे उत्पादन बन्द थियाे । अहिले वैकल्पिक उपायको अवलम्बन गरी सिमेन्टको पुनः उत्पादन सुरु गरिएको हेटौंडा सिमेन्ट उद्योगका महाप्रबन्धक वसन्तराज पाण्डेले बताए । उनका अनुसार उद्योगले ३ महिनासम्म उत्पादन बन्द गर्नुपर्दा निकै क्षति व्यहोर्नुपरेको छ । अ
हिले वैकल्पिक आर्थिक कारोबारको लागि उपाय अवलम्बन गरेर मात्रै उद्योग सञ्चालनमा ल्याउन सहज भएको उनले बताए । उद्योगका उपकरणको मर्मतसम्हारको लागि २ साता उत्पादन बन्द गरिएको भए पनि कोइलाको अभावले गर्दा साउनको दोस्रो सातादेखि सिमेन्ट उत्पादन बन्द गर्न बाध्यता भएको उद्योग व्यवस्थापनले जनाएको छ । सो उद्योगबाट दैनिक १० देखि १४ हजार बोरा गुणस्तरीय सिमेन्ट उत्पादन हुँदै आएको छ ।
