नेपाल पूर्वाधार 
काठमाडौं । विद्युत विकास विभागका नवनियुक्त महानिर्देशक चिरन्जीबी चटौतले निजी क्षेत्रलाई प्रोत्साहित गर्ने गरी काम गरिने बताएका छन् ।
महानिर्देशकमा नियुक्त भएपछि बधार तथा शुभकामना ज्ञापन गर्न गएको स्वतन्त्र ऊर्जा उत्पादकहरुको संस्था, नेपाल (ईप्पान) का पदाधिकारीसँगको भेटमा उनले विभाग र ईप्पानबीच नङ र मासुजस्तै सम्बन्ध रहेको उल्लेख गरे । ‘ऊर्जा विकासको गति यो ठाउँसम्म आइपुग्न निजी क्षेत्रको ठूलो योगदान रहेको हुदा आगामी दिनमा पनि निजी क्षेत्रलाई प्रोत्साहन गर्न कुनै कसर बाँकी राख्दिन’ उनले भने ।
ऊर्जा विकासमा समस्या भएको सबैले मनन गरेको सन्दर्भमा अब सबैतिरबाट समाधानमा ठोस पहल हुने महानिर्देशक चटौतको भनाई छ । ‘नियम कानुनको परिधिभित्र रहेर विभागले समयमै, छिटो, छरितो र चुस्त दुस्त कार्य सम्पादन गर्नेछ’ उनले भने । विभागको मुख्य काम नै ऊर्जा क्षेत्रमा संलग्न निजी क्षेत्रलाई प्रोत्साहन गर्दै ऊर्जा क्षेत्रको प्रवद्र्धन गर्नु हो रहेको छ ।
विभागमा लामो अनुभव भएको व्यक्ति महानिर्देशक भएर आएको हुँदा काममा सहज हुनुको साथै ठूलो अपेक्षा र आशा रहेको ईप्पानका अध्यक्ष कृष्णप्रसाद आचार्यले बताए । ‘ऊर्जा क्षेत्रमा समस्याको चाङ छन् । यस कार्यालयसँग सम्बन्धित मात्र नभई अन्य सरकारी कार्यालयसँग सम्बन्धित समस्याहरुको सहजीकरणा गर्नमा पनि सहकार्य र सहजीकरण हुन्छ भन्ने हामीलाई बिश्वास छ ।’ उनले भने ।
अध्यक्ष आचार्यले ईप्पान र विभाग एउटै सिक्काका दुई पाटा भएको बताउँदै आपसी सहकार्य र समन्वयबाट मात्र ऊर्जा क्षेत्रको विकास र प्रवद्र्धन हुनेमा जोड दिए ।
विभागका काममा ईप्पानको तर्फबाट समेत सम्पूर्ण सहयोग रहने बताउँदै अध्यक्ष आचार्यले नवनियुक्त महानिर्देशकको कार्यकाल ऊर्जा क्षेत्रको प्रवद्र्धनमा स्मरणयोग्य हुने विश्वास व्यक्त गरे ।
बधाई तथा शुभकामना दिन ईप्पानका अध्यक्ष कृष्णप्रसाद आचार्य, उपाध्यक्ष गणेश कार्की र मोहनकुमार डाँगी, महासचिव गोरे शेर्पा, सचिवहरु बलराम खतिवडा, भरत खत्री, सदस्यहरु बिक्रम बिष्ट, उत्तम ब्लोन लामा, भरत खड्का उपस्थित थिए ।
