नेपाल पूर्वाधार 
काठमाडौं । पश्चिम नवलपरासीको सदरमुकाम परासीका उपभोक्ताले खानेपानीको सुविधा लिएपनि महसुल नियमित नतिर्दा बक्यौता बढ्दै गएको छ । परासी खानेपानी तथा सरसफाइ उपभोक्ता समितिअन्तर्गतको सेवा लिएका उपभोक्ताले खानेपानीको महसुल समयमा नतिर्दा बक्यौता बढ्दै गएको हो ।
खानेपानी महसुल नियमित नउठ्दा अहिले बक्यौता बढेर करिब ४० लाख रुपैयाँ पुगेको परासी खानेपानी तथा सरसफाइ उपभोक्ता समितिले जनाएको छ । समितिका अनुसार खानेपानी उपभोगबापतको बक्यौता भुक्तानीका लागि १५ दिनको समय सीमा निर्धारण गरी तिर्न ताकेता गरिएपनि बक्यौता रकम उठ्न सकेको छैन ।
यो अवधिमा ३ लाख रुपैयाँ मात्रै महसुल बक्यौता उठेको समितिले जनाएको छ । समितिले महसुल नतिर्ने उपभोक्ताको धाराको लाइन काट्ने तथा बक्यौता बाँकी भएकाको नामावलीसहितको सूची सार्वजनिक गर्ने भनी ताकेता गरेपनि रकम उठ्न नसकेको अध्यक्ष खगेश्वर पन्थीले बताए ।
‘सबै गरी ४३ लाख २३ हजार महसुल बक्यौता उठ्न बाँकी थियो,’ उनले भने, ‘कडाईका साथ ताकेता गर्दा ३ लाख २१ हजार रुपैयाँ मात्रै उठ्यो । अझै ४० लाख रुपैयाँ उठ्न बाँकी छ । तिर्न कोही आउँदैनन् ।’ समितिका अनुसार स्थानीय राजनितिक नेताले नै खानेपानीको महसुल नियमित तिरेका छैनन् ।
उपभोक्ताले महसुल तिर्न अटेर गरेपछि अब खानेपानी वितरण रोक्न सुरु गरिएको उनले बताए । उनका अनुसार वडा नम्बर–१ र २ का ३ घरधुरीका उपभोक्ताको धाराको खानेपानीको लाइन काटेर वितरण रोकिएको छ । समितिले केही संस्थागत र व्यक्तिगत गरी महसुल नबुझाउने नौवटा धारा यसअघि नै काटेको थियो ।
३ महिनाभन्दा बढी समयको बक्यौता बाँकी रहेका उपभोक्ताको धमाधम धाराको लाइन काट्ने भनिएकोमा समितिले यसको सही ढंगले कार्यान्वयन गर्न सकेको छैन ।
