नेपाल पूर्वाधार 
काठमाडौं । म्याग्दीमा निर्माणाधीन ४० मेगावाटको राहुघाट जलविद्युत आयोजनाको मुख्य सुरुङ आधा खनिएको छ । नेपाल विद्युत प्राधिकरणको सहायक रघुगंगा हाइड्रो लिमिटेडले निर्माण गरिरहेको आयोजनाको ६.२ किलोमिटर लामो सुरुङको ५० प्रतिशत काम पूरा भएको हो ।
अहिलेसम्ममा ३ किलोमिटर सुरुङ खनेर सकिएको कम्पनीका कार्यकारी निर्देशक गणेश केसीले बताए । उनका अनुसार सुरुङ खन्ने क्रममा चट्टान कमजोर भेटिएकाले खन्न केही समस्या आए पनि समाधान गरी काम अगाडि बढाइएको छ ।
‘हाम्रो आयोजनाको सुरुङ खन्दै जाँदा चट्टान कमजोर पाइएकाले लक्ष्यअनुसार काम अघि बढाउन सकिएको छैन,’ उनले भने, ‘सुरुङको गोलाइ सानो हुँदा लम्बाई बढी भएकाले पनि सुरुङको काममा समय लागिरहेको छ ।’
उनले अहिले आयोजनाको सबै संरचनामा काम भइरहेको जानकारी दिए । सिभिलतर्फ ४५ प्रतिशत निर्माण पूरा भइसकेको पनि केसीले बताए । बाँध क्षेत्रको काम सुरु भइसकेको छ । बाँध क्षेत्रमा जग खनेर संरचना बनाउन सुरु गरिएको उनले बताए । बर्खाको समयमा पानी परिरहने हुँदा बाँधको काम प्रभावित भए पनि अरु समयमा निरन्तर भइरहेको उनले बताए ।
आयोजनाको विद्युतगृहको जग खन्न कार्य पूरा भई अहिले संरचना तयार भइरहेको छ । पेनस्टक सुरुङमा पनि धमाधम काम भइरहेको छ । १ हजार मिटर लामो पेनस्टक सुरुङ ८ सय मिटर खनिसकिएको छ ।
यो आयोजना अबको १४ महिनाभित्र सम्पन्न गरी विद्युत उत्पादन सुरु गर्ने पछिल्लो तालिका छ । अब आयोजनाबाट २०८० सालको साउनदेखि विद्युत उत्पादन सुरु गर्ने लक्ष्य तोकिएको छ ।
यसअघि २०७८ को मंसिरदेखि विद्युत उत्पादन गर्ने तालिका भए पनि कोरोना (कोभिड-१९) महामारीले लामो समय निर्माण प्रभावित हुँदा उक्त तालिकाअनुसार काम सम्पन्न गर्न नसकेको केसीले स्पष्ट पारे ।
आयोजना सम्पन्न भई उत्पादन हुने विद्युत कालीगण्डकी कोरिडोर प्रसारण लाइनको दाना सबस्टेसनमा जोडिनेछ । आयोजना सम्पन्न गर्न ९ अर्ब १५ करोड रुपैयाँ लागत अनुमान गरिएको छ ।
आयोजनाको काम २ लटमा विभाजन गरी अघि बढाइएको छ । लट–१ अन्तर्गत सिभिल तथा हाइड्रोमेकानिकलको काम राखिएको छ । लट–२ अन्तर्गत इलेक्ट्रोमेकानिकलको कामलाई राखिएको छ । पहिलो लटको ठेक्का २०७४ मंसिर ५ (सन् २०१७ नोभेम्बर २१) मा ठेक्का सम्झौता भएको थियो ।
सुरुमा यो आयोजना ३२ मेगावाटमा निर्माण गर्ने प्रक्रिया अघि बढाइएको थियो । भारतीय ठेकेदार आइभिआरसिएलसँग पहिलोट पटक २०६७ कात्तिक १८ गते आयोजनाको ठेक्का सम्झौता भएको थियो । पहिलो ठेकेदारले काम नगरेपछि २०७२ साल असार ३ गते ठेक्का रद्ध गरी आयोजनाको क्षमता स्तरोन्नति गरेर ४० मेगावाट बनाएर निर्माण सुरु गरिएको हो ।
