नेपाल पूर्वाधार 
काठमाडौं/ २५६६औं बुद्धजयन्ती विशेष समारोहमा सहभागी हुन लुम्बिनी आईपुगेका भारतीय प्रधानमन्त्री नरेन्द्र मोदी लुम्बिनी भ्रमणको क्रममा ६ बुँदे समझदारी भएको छ ।
प्रधानमन्त्री शेरबहादुर देउवा र भारतीय प्रधानमन्त्री मोदीको उपस्थितीमा दुई देशबीच सांस्कृतिक सम्बन्ध स्थापनादेखि अरुण चौथो जलविद्युत आयोजनाको विकास र विस्तार सम्बन्धी ६ बुँदे समझदारी भएका हुन् । प्रधानमन्त्री देउवाको निमन्त्रणामा सोमबार बिहान लुम्बिनी आएका उनले मायादेवी मन्दिरको दर्शन गरेका थिए । दर्शनपछि दुई देशका प्रधानमन्त्रीबीचमा छलफलपछि सो समझदारी भएको थियो ।
विशेष समारोहलाई सम्बोधन गर्दै भारतीय प्रधानमन्त्री मोदीले नेपाल भ्रमणमा आउँदा राजनीतिक भन्दा पनि आध्यात्मिक अनुभूति हुने गरेको बताउँदै नेपालबाट आफूले अध्यात्मिक आशिर्वाद पाउने गरेको उल्लेख गरे ।
भ्रमणको क्रममा भएका समझदारीका बुँदाहरु
१. बौद्ध दर्शन अध्ययनका लागि डा. अम्बेडकर चेयर स्थापना गर्ने सम्बन्धमा भारतीय सांस्कृतिक सम्बन्ध परिषद् (आईसीसीआर) र लुम्बिनी बौद्ध विश्वविद्यालयबीच समझदारी ।
२. भारतीय सांस्कृतिक सम्बन्ध परिषद् (आईसीसीआर) र नेपाल तथा एसियाली अध्ययन केन्द्र तथा त्रिभुवन विश्वविद्यालयबीच भारतीय अध्ययनको आईसीसीआर चेयर स्थापना गर्ने समझदारी ।
३. भारतीय सांस्कृतिक सम्बन्ध परिषद् (आईसीसीआर) र काठमाडौं विश्वविद्यालय (केयू) बीच भारतीय अध्ययनको आईसीसीआर चेयर स्थापना गर्ने समझदारी ।
४. काठमाडौं विश्वविद्यालय (केयू) र भारतको इन्डियन इन्स्टिच्युट अफ टेक्नोलोजी मद्रास (आईआईटीएम)बीच सहयोगको समझदारी ।
५. नेपालको काठमाडौं विश्वविद्यालय (केयू) र भारतको इन्डियन इन्स्टिच्युट अफ टेक्नोलोजी मद्रास (आईआईटीएम) भारतबीच स्नातकोत्तर तहमा संयुक्त डिग्री कार्यक्रम गरिने ।
६. अरुण चौथो आयोजनाको विकास र कार्यान्वयनका लागि सतजुल जलविद्युत् लिमिटेड र नेपाल विद्युत् प्राधिकरण (एनईए)बीच सम्झौता ।
