नेपाल पूर्वाधार 
काठमाडौं। स्वास्थ्य तथा खाद्य स्वच्छतामन्त्री निशा मेहताले नरदेवी आयुर्वेद अस्पताल तथा अस्पतालअन्तर्गत सञ्चालित वैद्यखानाको निरीक्षण गर्दै सरकारी आयुर्वेद औषधिको उत्पादन बढाउन, स्वदेशी जडीबुटीको उपयोग विस्तार गर्न र आयातमा निर्भरता घटाउनुपर्नेमा जोड दिएकी छन्।
आइतबार गरिएको निरीक्षणका क्रममा मन्त्री मेहताले अस्पतालबाट प्रदान हुँदै आएको आयुर्वेद उपचार, योग तथा प्राकृतिक चिकित्सा सेवा, औषधि उत्पादन, भण्डारण, प्रयोगशाला, जनशक्ति व्यवस्थापन तथा सेवा प्रवाहको अवस्थाबारे जानकारी लिइन्। उनले नागरिकले गुणस्तरीय, सहज र भरपर्दो आयुर्वेद सेवा पाउने वातावरण सुनिश्चित गर्न सेवा प्रवाहलाई अझ प्रभावकारी बनाउन सम्बन्धित अधिकारीलाई आग्रह गरिन्।
मन्त्री मेहताले सरकारी वैद्यखानाले नेपालमै उपलब्ध जडीबुटीको वैज्ञानिक उपयोग गर्दै स्वदेशी आयुर्वेदिक औषधिको उत्पादन विस्तार गर्नुपर्ने बताइन्। उनले उत्पादन क्षमता वृद्धि गरी सरकारी स्वास्थ्य संस्थाहरूमा आवश्यक औषधिको नियमित आपूर्ति सुनिश्चित गर्नुपर्नेमा पनि जोड दिइन्।
नेपालमा प्रशस्त मात्रामा पाइने जडीबुटीको वैज्ञानिक उपयोग, प्रशोधन र उत्पादनमार्फत स्वदेशी आयुर्वेद औषधिलाई प्रवर्द्धन गर्न सकिने उल्लेख गर्दै मन्त्री मेहताले त्यसका लागि मन्त्रालय आवश्यक नीतिगत तथा संस्थागत सहयोग गर्न प्रतिबद्ध रहेको बताइन्।
