SCAEF नेपालद्वारा परियोजना व्यवस्थापन क्षमता सुदृढीकरणका लागि ४ दिने तालिम शुभारम्भ

काठमाडौं । सोसाइटी अफ कन्सल्टिङ आर्किटेक्चरल एण्ड इन्जिनियरिङ फर्म्स (SCAEF नेपाल) ले नेपालको परामर्श, निर्माण क्षेत्र तथा सम्बन्धित सरकारी विभाग र मन्त्रालयअन्तर्गतका परियोजना स्वामी निकायहरू (३Cs) को व्यावसायिक क्षमता अभिवृद्धि गर्ने उद्देश्यले चार दिने प्रिमाभेरा P6 इन्टरमिडिएट तालिम कार्यक्रम शुभारम्भ गरेको छ। उक्त तालिम कन्स्ट्रक्सन बिजनेस डेभलपमेन्ट इम्प्लिमेन्टेसन कमिटी (CBDIC) तथा फेडेरेसन अफ कन्ट्र्याक्टर्स एसोसिएसन अफ नेपाल (एफक्यान) सँगको सहकार्यमा आयोजना गरिएको हो।

फेब्रुअरी २४ देखि २७, २०२६ सम्म सञ्चालन हुने कार्यक्रम काठमाडौंको गौशालास्थित होटल क्रिस्टल पशुपतिमा भइरहेको छ। आयोजकका अनुसार तालिममा परामर्शदाता इन्जिनियर, आयोजना व्यवस्थापक, प्राविधिक अधिकृत, परियोजना योजनाकार, सम्झौता व्यवस्थापक तथा परामर्श, निर्माण र सम्बन्धित सरकारी विभाग एवं मन्त्रालयका प्रतिनिधिहरूको उल्लेखनीय सहभागिता रहेको छ।

प्रविधिगत व्यवस्थापकीय सुधारमार्फत नेपालको परामर्श उद्योगलाई प्रवर्द्धन र सुदृढीकरण गर्ने उद्देश्यले स्थापित SCAEF नेपालले यो कार्यक्रम संस्थाको निरन्तर क्षमता विकास पहलअन्तर्गत सञ्चालन गरिएको जनाएको छ । पूर्वाधार परियोजनाहरू दिनानुदिन जटिल बन्दै गइरहेको सन्दर्भमा समयमै सम्पन्नता, लागत नियन्त्रण र गुणस्तरीय कार्यसम्पादन सुनिश्चित गर्न प्रभावकारी परियोजना व्यवस्थापन अत्यावश्यक बन्दै गएको संस्थाले उल्लेख गरेको छ।

तालिमको मुख्य उद्देश्य प्रिमाभेरा P6 सफ्टवेयर प्रयोग गरी परियोजना योजना निर्माण, कार्यतालिका (सिड्युलिङ), स्रोत परिचालन, लागत नियन्त्रण तथा बजेट व्यवस्थापनसम्बन्धी सीप सुदृढ गर्नु रहेको छ। आयोजकहरूले प्राविधिक दक्षताको अभावका कारण परियोजनाहरूमा ढिलाइ, लागत वृद्धि तथा कार्यसम्पादनमा कमजोरी देखिने गरेको उल्लेख गर्दै यस्ता तालिमहरूले ती चुनौतीहरूको व्यावहारिक समाधान प्रदान गर्ने विश्वास व्यक्त गरेका छन्।

चार दिने तालिम अवधिमा सहभागीहरूले वर्क ब्रेकडाउन स्ट्रक्चर (WBS) विकास, गतिविधि परिभाषा, नेटवर्क विश्लेषण, स्रोत लोडिङ, प्रगति अनुगमन, प्रतिवेदन तयारी तथा कार्यसम्पादन मूल्यांकनसम्बन्धी व्यवहारिक अभ्यास प्राप्त गरिरहेका छन्। तालिमको अन्त्यसम्म सहभागीहरू उद्योगमा प्रचलित मापदण्डअनुसार परियोजना कार्यतालिका तयार गर्न, स्रोतहरूको प्रभावकारी व्यवस्थापन गर्न तथा व्यावसायिक सफ्टवेयर उपकरणमार्फत समग्र परियोजना प्रदर्शन अनुगमन गर्न सक्षम हुने अपेक्षा गरिएको छ।

SCAEF नेपालले कन्स्ट्रक्सन बिजनेस डेभलपमेन्ट इम्प्लिमेन्टेसन कमिटी (CBDIC) तथा फेडेरेसन अफ कन्ट्र्याक्टर्स एसोसिएसन अफ नेपाल (FCAN) सँगको संयुक्त पहलमा सम्बन्धित सरकारी विभाग तथा मन्त्रालयका परियोजना स्वामी (क्लाइन्ट) निकायहरू, परामर्शदाता र निर्माण व्यवसायी (३Cs) लाई देशव्यापी रूपमा यस्ता कार्यक्रमहरूमा सक्रिय सहभागिता जनाई आफ्नो व्यावसायिक दक्षता अभिवृद्धि गर्न आह्वान गरेको छ। यस्ता सहकार्यात्मक पहलहरूले नेपालको परामर्श तथा निर्माण क्षेत्रमा दीर्घकालीन संस्थागत सुधार र परियोजना कार्यान्वयनको उच्च मापदण्ड स्थापना गर्न महत्वपूर्ण योगदान पुर्‍याउने विश्वास व्यक्त गरिएको छ।

यस तालिम तथा अन्य क्षमता विकास कार्यक्रमसम्बन्धी थप जानकारीका लागि इच्छुक व्यक्तिहरूले SCAEF नेपालसँग सम्पर्क गर्न सक्नेछन्।

सम्पर्क विवरण:
इमेल: scaefnepal@scaef.org.np, scaefnepal@gmail.com