नेपाल पूर्वाधार 
काठमाडौं । भैरहवास्थित टाइगर प्यालेस बाइ साेल्टीले एक वर्षमा ४२ करोड २० लाख रुपैयाँको कारोबार गरेकाे छ ।
टाइगर प्यालेस सञ्चालन गरिरहेको टाइगर वान प्रालिले २०२५ मा ४२ करोड २० लाख रुपैयाँको कारोबार गरेको हो । यसअघि २०२४ मा यो कम्पनीले २३ करोड ८० लाख रुपैयाँको कारोबार गरेको थियो भने २०२३ मा यसको व्यापार १२ करोड ९० लाख रुपैयाँ थियो । २०२२ मा भने कम्पनीको व्यापार ७ करोड ६० लाख रुपैयाँ भएको थियो ।
त्यस्तै, २०२१ मा कम्पनीले १ करोड ६० लाख रुपैयाँको कारोबार गरेको थियो ।
२०२३ सम्म नकरात्मक ओपिबिडिआइटिए मार्जिन कायम भएको कम्पनीले २०२४ यता भने सकरात्मक मार्जिन कायम गर्न सफल भएको छ । २०२४ मा १२.२ प्रतिशत मार्जिन कायम भएको कम्पनीले २०२५ मा भने ५२.८ प्रतिशत मार्जिन कायम भएको छ ।
२०१४ मा कम्पनी स्थापना भएर २०१७ बाट सञ्चालनमा आएको टाइगर प्यालेस रिसोर्ट २०२४ बाट भने सोल्टीले किनेसँगै टाइगर प्यालेस बाइ सोल्टीका रुपमा रिब्रान्डिङ भएको थियो । भैरहवामा रहेको यो रिसोर्ट नेपालकै पहिलो क्यासोनोसहितको पाँच तारे रिसोर्ट हो । सात एकड जमिनमा फैलिएको यो रिसोर्टमा हाल १०२ वटा कोठाहरू रहेका छन् ।
यसले सम्पूर्ण सेयर स्वामित्व सिल्भर ह्यारिटेज इन्भेस्टमेन्ट प्रालिसँग रहेको छ ।
हालका लागि भने यो कम्पनीले २ अर्ब ४९ करोड रुपैयाँको कर्जा सुविधाका लागि रेटिङ गराएको छ । जसमा इक्रा नेपालले कम्पनीलाई २ अर्ब २१ करोड रुपैयाँको दीर्घकालिन कर्जा सुविधाका लागि एलडि र २८ करोड रुपैयाँको अल्पकालिन कर्जा सुविधाका लागि डि रेटिङ दिएको छ ।
