अनुदान भुक्तानी माग्दै दोस्रो दिन पनि आन्दोलनमा उखु किसान

काठमाडौं । सरकारले गत आर्थिक वर्षको उखुको अनुदान भुक्तानी नदिएको भन्दै उखु किसानहरूले आन्दोलन गरिरहेका छन् ।

आइतबारबाट सुरु भएको आन्दोलन सोमबार पनि निरन्तर भएको छ । गत आर्थिक वर्षको उखुको अनुदान भुक्तानी माग गर्दै उखु किसानहरु काठमाडौं आएका छन् ।

उखु उत्पादक महासंघ, उखु उत्पादक कृषक समिति लगायतले गत आर्थिक वर्षको उखुको वक्यौता अनुदान रकम भुक्तानी हुनुपर्ने भन्दै आन्दोलन सुरु गरेका हुन् । किसानहरूले प्रतिक्वीन्टल ७० का दरले भुक्तानी गर्नुपर्ने भन्दै प्रदर्शन गरेका हुन्।

हिजोदेखि उखुसहित माइतीघरमा धर्ना बसेका उनीहरुले आज पनि यसलाई निरन्तरता दिएका हुन् ।

प्रदर्शनमा सहभागीहरूले एकतर्फी मूल्य स्वीकार छैन, उखु कृषक शोषण बन्द गर, उखु अनुदान भुक्तानी गर, मूल्य निर्धारणमा कृषकलाई सहभागी गरलगायतका प्लेकार्ड प्रदर्शन गरेका छन्।