नेपाल पूर्वाधार 
काठमाडौं । ललितपुरस्थित पाटन अस्पतालको स्तरोन्नती हुने भएको छ ।
पाटन स्वास्थ्य विज्ञान प्रतिष्ठानले स्तरोन्नतीका लागि वन तथा वातावरण मन्त्रालयमा वातावरणीय प्रभाव मूल्यांकन प्रतिवेदन पेश गरेको हो ।
कुल १० अर्ब ७३ करोड २३ लाख ५४ हजार ६७९ रुपैयाँ लागतमा यो अस्पतालको स्तरोन्नती हुन लागेको हो ।
हाल ६ सय शय्या रहेको अस्पताललाई अब १२ सय शय्या बनाउने गरि प्रस्ताव गरिएको छ । यसका लागि दुई तल्ला बेस्मेन्ट, भुँई तल्ला र ७ तल्ला अग्लो हुने गरि १० तल्लाको भवन निर्माण गर्न लागिएको छ ।
नयाँ भवनको तल्लो बस्मेन्ट पार्किङका लागि प्रयोग हुनेछ, जसको क्षेत्रफल ५ हजार ३२७.६ वर्ग मिटर रहनेछ भने भुँई तल्ला ५ हजार २११.५६ वर्ग मिटरको रहनेछ । भुँई तल्लामा ५ सय वटा बाइक र ३ सय वटा कार पार्किङ गर्न सकिने वातावरणिय प्रभाव मूल्यांकन प्रतिवेदनमा उल्लेख गरिएको छ ।
त्यस्तै, सातौं तल्लाको क्षेत्रफल ४ हजार ३५३.०९ वर्गमिटर हुने गरि प्रस्ताव गरिएको छ र त्यसमाथि सबैभन्दा माथिल्लो भागमा २५५.९७ वर्ग मिटर क्षेत्रफलमा भने पानीको टंकी राखिनेछ ।
हाल दैनिक दुई लाख लिटर पानी प्रयोग भइरहेको अस्पतालमा स्तरोन्नतीपश्चात भने चार लाख लिटर पानी दैनिक प्रयोग हुनेछ ।
यो आयोजना निर्माण सुरु भएको ३६ महिना अर्थात ३ वर्षभित्रमा सम्पन्न गर्ने प्रस्ताव गरिएको छ ।
