सरकारले मितेरी पुल पुन: सञ्चालनमा ल्याउन चीनसँग सहयोग माग्ने

काठमाडौं । सरकारले मितेरी पुल पुन: सञ्चालनमा ल्याउन चीन सरकारसँग सहयोग माग्ने निर्णय गरेको छ ।

मंगलबार बसेको विपद् कार्यकारी परिषद्को बैठकले यस्तो निर्णय गरेको हो ।

बुधबार आयोजित पत्रकार सम्मेलनमा बैठकको निर्णय बारे जानकारी दिँदै विपद् जोखिम तथा न्युनीकरण प्राधिकरणका कार्यकारी निर्देशक दिनेश भट्टले रसुवाको मितेरी पुल पुन: सञ्चालनमा ल्याउन चीनसँग आग्रह गर्ने बताएका हुन् ।

‘मितेरी पुल चीन र नेपालबीचको महत्वपुर्ण नाका भएकाले यसलाई तत्कालै सूचारु गर्न चीनसँग सहयोगका लागि अनुरोध गर्ने निर्णय भएको छ’, उनले भने ।

मंगलबार आएको बाढीका कारण रसुवागढी नाकामा नेपाल र चीनलाई जोड्ने मितेरी पुल बगेको छ । त्यहाँ रहेको निर्माणाधिन सुख्खा बन्दरगाहमा पनि बाढीले ठूलो क्षति पुर्याएको छ ।