नेपाल पूर्वाधार 
काठमाडौं । जेठ १५ गते गणतन्त्र दिवसको अवसरमा टुँडिखेलमा आयोजित कार्यक्रममा सम्बोधन गर्दै प्रधानमन्त्री केपी शर्मा ओलीले राजावादी समूह लक्षित अभिव्यक्ति दिएका छन् ।
प्रधानमन्त्री ओलीले जनताको निर्णय अधिकारलाई फेरि एउटा अभिजात वंशमा केन्द्रित गर्न खोज्ने प्रयास भईरहेको बताएका हुन् । उनले ईतिहासका विभिन्न कालखण्डमा निरंकुश राजतन्त्र र जनताबीच संघर्ष भएर जनतासँग भएका सम्झौता पटक पटक तोडेको हुकुमी राजतन्त्रलाई परास्त गर्दै जनताले गणतन्त्र स्थापना गरेको ओलीले बताए ।
“जनताको निर्णय अधिकारलाई फेरि एउटा अभिजात बंशमा केन्द्रित गर्न खोज्ने प्रयास आज पनि भइरहेको छ “, उनले भने, “स्वतन्त्रताको अभ्यासमा हुर्केको आजको समाजले जनताको मतभन्दा शाही इशारा ठूलो हो किमार्थ भन्न सक्दैन ।”
हजारौं शहीदको बलिदान र लाखौं नेपालीको सपनाभन्दा अढाइसय वर्षसम्म बदनाम शासन चलाएर देशलाई पछाौटे अवस्थामा पुर्याउने एउटा वंशको विशेषाधिकार कुनै अर्थमा पनि ठूलो हुन नसक्ने प्रधानमन्त्री ओलीले बताएका छन् । उनले ईतिहास स्मरण र मनन गर्ने कुरा रहेको र बाँच्नु पर्ने वर्तमानमै रहेको पनि बताए ।
साथै उनले गणतन्त्रलाई नारामा मात्रै नभएर व्यवहारमा पनि संस्थागत गर्दै लैजानुपर्ने समेत बताएका छन् ।