नेपाल पूर्वाधार 
काठमाडौं । कास्की जिल्लाको माछापुच्छ्रे गाउँपालिका–४ हुँदै बग्ने सेती नदीमा निर्माण सम्पन्न भएको २५ मेगावाट क्षमताको जलविद्युत आयोजना हालैदेखि नियमित रूपमा सञ्चालनमा आएको छ।
भिजन लुम्बिनी ऊर्जा कम्पनी लिमिटेडको लगानीमा तयार गरिएको यो आयोजना गत वर्षको कार्तिक २७ गतेदेखि विद्युत् उत्पादनमा संलग्न भए पनि यसको औपचारिक उद्घाटन भने हालै शुक्रबार सम्पन्न गरिएको हो।
परियोजना प्रमुख जगतबहादुर पोखरेलका अनुसार, यो आयोजना टनेल प्रविधिमार्फत निर्माण गरिएको हो, जसमा १६ क्युसेक पानीको वहाव, १६३.५० मिटर ग्रस हेड, करिब ६ किलोमिटर लामो हेडरेस पाइप र दुईवटा होरिजेन्टल एक्सिस फ्रान्सिस टरबाइन जडान गरिएको छ। आयोजनाको क्याचमेन्ट क्षेत्र २६६.३५ वर्ग किलोमिटर रहेको बताइएको छ।
आयोजनाबाट वार्षिक रूपमा झन्डै १९.०९ गिगावाट आवर विद्युत् उत्पादन हुने अनुमान गरिएको छ, भने अहिले मासिक औसत १.५९ गिगावाट आवर उत्पादन भइरहेको छ।
उत्पादित विद्युत् नेपाल विद्युत् प्राधिकरणको १३२ केभी क्षमताको ट्रान्समिसन लाइनमार्फत लेखनाथ सबस्टेसनमा प्रवाह भइरहेको छ।
