नेपाल पूर्वाधार 
काठमाडौं । मिलेनियम च्यालेन्ज एकाउन्ट (एमसिए) नेपालले लुम्बिनी प्रदेशको नवलपरासी (बर्दघाट सुस्तापश्चिम) जिल्लामा ४०० केभी नयाँ बुटवल सबस्टेसन निर्माण गर्न ठेकेदार नियुक्त गरेकाे छ । एमसिए नेपालले याे सबस्टेसन निर्माण गर्ने ठेक्का भारतकाे लिंकसन इण्डिया प्रालिलाई निर्माण गर्न दिने गरी ठेक्का सम्झाैता गरेकाे छ ।
ठेक्का सम्झाैतामा बिहीबार एमसिए नेपाल र भारतीय कम्पनीबीच ठेक्का सम्झाैतामा हस्ताक्षर गरेको छ । याे सबस्टेसन एमसीसी परियाेजनाकाे बुटवल-गाेरखपुर ४०० केभी प्रसारण लाइन अन्तर्गत निर्माण हुँदैछ । ठेक्का सम्झाैता अनुसार याे सबस्टेसन भारतीय कम्पनीले अबकाे ३९ महिनाभित्र सम्पन्न गरी सञ्चालनमा ल्याउनुपर्नेछ ।
नवलपरासी (बर्दघाट सुस्तापश्चिम) मा आयोजित हस्ताक्षर समारोहमा नेपाल विद्युत् प्राधिकरणका कार्यकारी निर्देशक कुलमान घिसिङ, नेपालका लागि संयुक्त राज्य अमेरिकी राजदूत डिनआर थम्पसन, स्थानीय अधिकारीहरू तथा निर्वाचित जनप्रतिनिधिको उपस्थिति थियो ।
कार्यक्रमलाई सम्बोधन गर्दै अमेरिकी राजदूत थम्पसनले नेपालको ऊर्जासम्बन्धी आवश्यकता सम्बोधनका लागि कम्प्याक्ट उपयोगी रहेको सुनिश्चित गर्ने सन्दर्भमा अमेरिकी सरकार, नेपाल सरकारसँग सहकार्य गर्न प्रतिबद्ध रहेकाे बताए । उनले घरेलु उपभोग, विस्तारित व्यापारिक एवं औद्योगिक संस्थाहरू तथा सीमापार विद्युतीय व्यापारका लागि भरपर्दाे एवं धान्न सकिने विद्युत् उपलब्ध गराइरहेको नेपालको विद्युत् प्रसारण क्षमतामा ४०० केभी नयाँ बुटवल सबस्टेसनले सुधार ल्याउने बताए ।
विद्युत प्राधिकरणका कार्यकारी निर्देशक घिसिङले याे सबस्टेसन अन्तरदेशीय विद्युत व्यापारका लागि महत्त्वपूर्ण रहेकाे बताए । उनले याे सबस्टेसन निर्माण हुँदा अहिले बुटवलमा चालू अवस्थामा रहेकाे २२० केभी सबस्टेसनकाे लाेड व्यवस्थापनमा भविश्यमा सहयाेग पुग्ने बताए ।
कार्यक्रममा एमसिए–नेपालका कार्यकारी निर्देशक खड्गबहादुर विष्टले एमसिसी नेपाल कम्प्याक्ट कार्यान्वयनका क्रममा भइरहेका समष्टिगत प्रगतिमाथि प्रकाश पारे । “एमसिए–नेपालले विद्युत् प्रसारण आयोजनाअन्तर्गत प्रसारण लाइन र सबस्टेशनहरूको निर्माणसम्बन्धी सम्पूर्ण कार्यलाई तीव्रतापूर्वक अगाडि बढाइरहेको छ । बाँकी दुईवटा सबस्टेशनको निर्माणसम्बन्धी सम्झौतामा हस्ताक्षर गर्नका लागि हामी खरिद प्रक्रियाको अन्तिम चरणमा छौँ ,”उनले भने ।
एमसिए–नेपालले नेपाल सरकारको लगानी तथा अमेरिकी सरकारको मिलेनियम च्यालेञ्ज कर्पाेरेशनबाट आर्थिक अनुदान प्राप्त विद्युत् प्रसारण आयोजनाअन्तर्गत यस सबस्टेशनका अतिरिक्त नुवाकोट जिल्लाको रातमाटेमा र तनहुँ जिल्लाको दमौलीमा पनि एक–एकवटा सबस्टेशन निर्माण गर्दैछ । ती सबस्टेसनका लागि निर्माण कम्पनीको छनोट हुँदैैछ ।
अर्थ मन्त्रालयका सचिव अध्यक्ष रहेकाे एमसिए–नेपालको सञ्चालक समितिको २०८० साल फागुनमा बसेको बैठकले भारतसँगको सम्झौतामा उल्लेख गरिएअनुरूप सीमापार ऊर्जा व्यापारलाई समयमै अगाडि बढाउनका लागि सहजीकरण गर्न नयाँ बुटवल–गोरखापुर विद्युत् प्रसारण लाइनको नेपाली क्षेत्रमा पर्ने १८ किमी अंशको निर्माणलाई अगाडि बढाउने निर्णय गरेको थियो ।
