नेपाल पूर्वाधार 
काठमाडौं। चाैंथाे संस्करणकाे हिमालयन हाइड्राे एक्स्पाे २०२४ सुरु भएकाे छ । बुधबार बिहान विद्युतीय सवारी (इभी) र्याली सम्पन्न भएसँगै स्वतन्त्र ऊर्जा उत्पादकहरुको संस्था, नेपाल (इपान) ले आयोजनामा गरेकाे एक्स्पाेकाे शुभारम्भ भएकाे हाे ।
एक्स्पाेका अवसरमा प्रट्राेलियम आयात प्रतिस्थापन गर्न विद्युत खपत बढाउन विद्युतीय गाडी प्रवर्द्धन गर्ने उद्देश्यले बिहान ६.३० देखि ८ बजेसम्म इभी र्याली गरिएकाे छ । र्यालीको ऊर्जा जलस्रोत तथा सिँचाइ मन्त्री शक्तिबहादुर बस्नेतले उद्घाटन गरे ।
उद्घाटन सत्रलाई सम्बाेधन गर्दै ऊर्जा मन्त्री बस्नेतले इपानले हिमालयन हाइड्रो एक्स्पोले लगानी सम्मेलनलाई पनि अझै सार्थक बनाउने विश्वास व्यक्त गरे ।
‘हाइड्रो एक्स्पोका अवसरमा गरिएकाे इभी र्यालीले स्वदेशी बिजुली खपत बढाउन तथा विद्युतीय सवारी प्रर्वद्धनमा सहयोग पुग्ने विश्वास लिएकाे छु’ उनले भने । हाइड्रो एक्स्पो नेपालको जलविद्युत क्षेत्रमा लगानीको वातावरण बनाउन सहयोगी सावित हुने पनि उनले बताए ।
यस्तै,इपान अध्यक्ष गणेश कार्कीले नेपालकाे विद्युत देशभित्रै खपत गर्न प्राेत्साहन गर्ने उद्देश्यले इभी र्याली आयोजना गरिएकाे बताए । सरकारले सन् २०३५ सम्ममा विद्युत खपत १३ हजार मेगावाट पुर्याउने लक्ष्य लिएकाले विद्युतीय सवारीकाे उपयाेग बढाएमा याे लक्ष्य पूरा गर्न सहयाेग पुग्ने बताए ।
‘सरकारले सन् २०३५ सम्ममा २८ हजार ५०० मेगावाट विद्युत उत्पादन र १३ हजार मेगावाट स्वदेशमा खपत गर्ने लक्ष्य लिएको छ । यसलाई सार्थक बनाउन पनि इभी र्यालीले सहयोग गर्छ ।’ उनले भने ।
एक्स्पो व्यवस्थापक इभेन्ट सोलुसनका प्रबन्धक बिजयसागर प्रधानले विद्युतीय सवारी स्वदेशी बिजुली खपतका साथै वातावरण मैत्री रहेका कारण नेपालको लागि उपयुक्त रहेको बताए ।
हाइड्रो एक्स्पोको सुरुवात अघि भएको र्याली कमलादीको स्काई वाक टावरबाट सुरु भइ सिंहदरबार, बानेश्वर, सातदोबाटो, एकान्तकुना, पुल्चोक, त्रिपुरेश्वर, नारायणहिटी, हुँदै भृकुटी मण्डपमा गएर समापन भएको थियो । र्यालीले २६ किलाेमिटरकाे यात्रा तय गरेकाे थियाे ।
र्यालीमा ३ सयभन्दा बढी विद्युतीय सवारी सहभागी थिए । एक्स्पोमा पहिलो दिन ३ वटा प्राविधिक सत्रहरु आयोजना गरिएको छ । राष्ट्रपति रामचन्द्र पौडेलले भोलि बिहीबार एक्स्पोको उद्घाटन गर्नेछन् । एक्स्पाे बैशाख १४ गतेसम्म चल्नेछ । एक्स्पाेमा १ सय भन्दा बढी स्टलहरू प्रदर्शनीमा राखिएकाे छ । एक्स्पाेकाे ५० हजार बढीले अवलाेकन गर्ने लक्ष्य छ ।
