नेपाल पूर्वाधार 
चितवन । चितवनको इच्छाकामना गाउँपालिका–२ को दुर्गम मायाटार गाउँमा राष्ट्रिय प्रसारण प्रणालीकाे विद्युत पहुँच पुगेकाे छ । नेपाल विद्युत प्राधिकरणले विद्युतीकरण विस्तार गरी याे गाउँमा विद्युत पहुँच पुर्याएकाे हाे ।
शनिबारबार पहिलाे पटक याे गाउँमा विद्युत पुगेपछि अब अन्धकारको युग अन्त्य भएको गाउँपालिका अध्यक्ष दानबहादुर गुरुङले बताए । उनले बत्तीकाे स्वीच थिचेर बत्ती बाल्दै मायाटार गाउँ विकासकाे एक खुड्किलाे माथि उक्लिएकाे बताए ।
विद्युत् सेवा पुग्न बाँकी मायाटार, रमाइलो डाँडा, तेर्सेगाउँ, डाँडागाउँ, हेप्चे र घुर्केसलगायत एक सय घर बढीमा बिजुली पुगेको अध्यक्ष गुरुङले बताए ।
विद्युत् प्राधिकरण भरतपुर वितरण केन्द्र र इच्छाकामना गाउँपालिकाको सहयोगमा विपन्न परिवारलाई ‘मिटर बक्स, केबल र एमसिभी’ वितरण गरिएको छ ।
गाउँपालिकाका अध्यक्ष गुरुङ, विद्युत् प्राधिकरण भरतपुर वितरण केन्द्रका प्रमुख रामु श्रेष्ठ, वडा नं २ का अध्यक्ष पञ्चबहादुर चेपाङले सो क्षेत्रका विपन्न ६० घरमा निःशुल्क मिटरबक्स, कबललगायत उपकरण निःशुल्क वितरण गरे । प्राविधिकले तिनलाई जडान पनि गरेका छन् ।
इच्छाकामना गाउँपालिका–१ को २ सय घरमा विद्युत् सेवा पुगेपछि गाउँ नै झलमल्ल भएको छ । बैशाख लागेपछि बाँकी क्षेत्रमा पनि सेवा विस्तार गरिने प्राधिकरणले जनाएको छ ।
