नेपाल पूर्वाधार 
सिमकोट । हुम्लाको खार्पुनाथ गाउँपालिका–३ राया गाउँका सरकारी तथा संघ संस्थाका कार्यालयमा विद्युत् सेवा विस्तार गरिएको छ । रायाखोला लघु जलविद्युत आयाेजनाकाे विद्युत २४ घन्टा उपलब्ध गराउने गरी सेवा विस्तार गरिएकाे हाे ।
यसअघि हुम्ला माध्यमिक विद्यालय, स्वास्थ्यचौकी र सहकारीलाई राति मात्रै विद्युत् सेवा उपलब्ध गराउँदै आएको थियो । बुधबारदेखि २४ घन्टाका लागि विद्युत् पहुँच निरन्तर हुने गरी सेवा विस्तार गरिएको रायाखोला लघु जलविद्युत कार्यालयका अध्यक्ष टेकबहादुर बुढाले बताए । स्वास्थ्यचौकीमा बिरामीको विद्युतीय माध्यमबाट सेवा प्रवाहमा सघाउन लाइन विस्तार गरिएको अध्यक्ष बुढाले बताए ।
विद्यालय, स्वास्थ्यचौकी, वडा कार्यालय र सहकारी संस्थालाई सेवा प्रवाह गर्न विद्युत् सेवा उपलब्ध गराइएको उनले बताए । अब यी सरकारी कार्यालयमा निरन्तर विद्युत् सेवा उपलब्ध भएपछि दैनिक कार्यसम्पादन गर्न सहज हुनेछ ।
विद्युत् लाइन विस्तार गर्न तारको व्यवस्था उक्त कार्यालयले गरेको थियोभने प्राविधिक खर्च वडा कार्यालयले बेहोरेको थियो । वडा कार्यालय, स्वास्थ्यचौकी र विद्यालयलाई मासिक २ हजार रुपैयाँ विद्युत् शुल्क तोकिएको अध्यक्ष बुढाले बताए । गाउँमा रहेको दुधेदह प्राङ्गारिक कृषि सहकारी संस्थालाई सरकारी कार्यालयलाई एक हजार रुपैयाँ शुल्क तोकिएको छ ।
गाउँमा विद्युत् सेवा उपभोग गर्ने सेवाग्राहीलाई प्रतियुनिट १० रुपैयाँ शुल्क तोकिएको छ । २५ किलोवाट क्षमताको रायाखोला लघु जलविद्युत् आयोजनाबाट विगत ६ वर्षदेखि जिल्लाका विभिन्न भागमा विद्युत् सेवा प्रदान हुँदै आएको छ ।
