नेपाल पूर्वाधार 
पर्वत । दक्षिण पर्वतको पैँयू गाउँपालिकाले चालू आर्थिक वर्षमा १३ वटा साना सिँचाइ आयोजना निर्माणमा जाने भएका छन् । पालिकाभित्रका ७ वटै वडामा रहेका विभिन्न कृषि सहकारी, कृषक समूह, तथा समितिले सञ्चालन गरेका व्यावसायिक फार्ममा सिँचाइ सुविधा उपलब्ध गराउने उद्देश्यले यस वर्ष १३ वटा योजना छनोट गरी निर्माणमा लैजाने तयारी भइरहेकाे हाे ।
सिँचाइको सुविधाबाट वञ्चित क्षेत्रका व्यावसायिक कृषकलाई यो कार्यक्रम लाभदायक हुने पैँयू गाउँपालिकाका प्रमुख प्रशासकीय अधिकृत इन्जिनियर राजीव रिमालले जानकारी दिए । उनका अनुसार टकलाक सिँचाइ कुलो निर्माणका लागि २ लाख रुपैयाँ, त्रिवेणीको बोकेखोला गल्छिना कुलो निर्माणका लागि एक लाख रुपैयाँ, वडा नं २ को अर्नास खाद्यान्न बाली उत्पादक समूहका लागि एक लाख रुपैयाँ बजेट विनियोजन गरिएको छ ।
यसैगरी, उपल्लो चालिसे सिँचाइ कुलो योजना बेउलीवासका लागि एक लाख ५० हजार रुपैयाँ, काउदी पिपलमुनि सिँचाइ कुलो बेउलीवासका लागि ५० हजार रुपैयाँ, घोप्टेखोला सिँचाइ कुलो मर्मत हुवासका लागि एक लाख रुपैयाँ विनियोजन भएको छ ।
इन्जिनियर रिमालका अनुसार झौरीखेत महने सिँचाइ कुलो निर्माणका लागि एक लाख रुपैयाँ, पिल्लेटारी सिँचाइ कुलो निर्माणका लागि एक लाख ५० हजार रुपैयाँ, ठाडेखोला सिँचाइ कुलो निर्माण भुर्तेलथोकका लागि ५० हजार रुपैयाँ, कुवादीखोला, दशमुखरे, बेलवादी फाँट सिँचाइ योजना सरौखोलाका लागि २ लाख रुपैयाँ विनियोजन भएको छ । अर्बुदखोला सिँचाइ योजनाका लागि ५० हजार रुपैयाँ, तथा भोर्लेखोला सिँचाइ योजनालाई एक लाख रुपैयाँ, र सोतीपोखरी–डाँडाखेत सिँचाइ योजनाका लागि ५० हजार रुपैयाँ विनियोजन भएको छ ।
चालू आवका लागि साना सिँचाइ योजनामा पालिकाले १४ लाख रुपैयाँ विनियोजन गरेको थियो । पालिकाले दश दिनभित्रमा योजना सम्झौता गरी निर्माण कार्य थालनी गर्ने अनुरोध गरेको छ । सबै योजना चालु आवभित्र नै सम्पन्न गर्नुपर्ने प्रमुख प्रशासकीय अधिकृत रिमालले बताए ।
सिँचाइको सुविधा नपुगेका व्यावसायिक फार्ममा आवश्यक पानी विभिन्न स्रोतबाट उपलब्ध गराउने उद्देश्यले कृषि फार्म र कृषिसँग सरोकार राख्ने संस्थामार्फत साना सिँचाइ योजना निर्माण गर्न थालिएको पालिकाका अध्यक्ष तोरण मल्ल ठकुरीले बताए। उनका अनुसार माग भएका अन्य योजनालाई आगामी आवमा समावेश गरिने भएको छ । यसबाहेक साना सिँचाइका पुराना योजना मर्मतका लागि पनि पैँयू गाउँपालिकाले विभिन्न आठ वटा आयोजना छनोट गरिएको उनले बताए ।
