नेपाल पूर्वाधार 
काठमाडौं । सरकारले नेपाल आयल निगमको कार्यकारी निर्देशक नियुक्तिका लागि प्रतिश्पर्धा आह्वान गरेको छ । उद्योग, वाणिज्य तथा आपूर्ति मन्त्रालयले उमेशप्रसाद थानीले राजिनामा दिएपछि रिक्त रहेको पदपूर्ति गर्न खुल्ला प्रतिश्पर्धा आह्वान गरेको हो ।
मन्त्रालयले शनिबार सूचना जारी गरी योग्य व्यक्तिबाट रिक्त पदपूर्तिका लागि आवेदन मागेको छ । कार्यकारी निर्देशक पदका लागि निगमको कार्य प्रकृतिसँग सम्बन्धित विषय वा प्रशासन व्यवस्थापन, अर्थशास्त्र, इञ्जिनियरिङ वा कानूनमा स्नातकोत्तर गरी ३५ वर्ष पूरा गरी ६५ वर्ष ननाघेको व्यक्तिले आवेदन दिन सक्नेछन् ।
आवेदन दिने व्यक्तिसँग कुनै संस्था वा निकायको व्यवस्थापकिय जिम्मेवारीमा कम्तीमा ५ वर्षसम्म काम गरेको कार्यानुभव हुने पर्ने पनि सूचनामा भनिएको छ । कार्यकारी निर्देशक पदका लागि योग्य व्यक्तिले सूचना जारी भएको मितिले २१ दिनभित्र आवेदन दिइसक्नु पर्ने पनि सूचनामा भनिएको छ ।
थानीले व्यक्तिगत कारण देखाउँदै १५ महिना अगाडि नै गत मंसिर २७ गते पदबाट राजिनामा दिएपछि निगमको कार्यकारी निर्देशक पद रिक्त छ । अहिले नागेन्द्र साहले निमित्त कार्यकारी निर्देशककोरूपमा कार्यसम्पादन गरिरहेका छन् ।
