नेपाल पूर्वाधार 
काठमाडौं । नेपाल राष्ट्र बैंकका गर्भनर महाप्रसाद अधिकारीले उद्योगी/व्यापारी/व्यवसायीले बाणिज्य बैंकहरूले ऋणको ब्याज १६ देखि १८ प्रतिशतसम्म लिएको भन्ने गलत आरोप लगाएर त्यसको प्रचार गरिरहेको बताएका छन् । नेपाल आर्थिक पत्रकार समाज (सेजन) को २७औं वार्षिकोत्सवका अवसरमा शुक्रबार राजधानीमा आयोजित कार्यक्रमलाई सम्बोधन गर्दै अधिकारीले यस्तो बताएका हुन् ।
उनले उद्योगी/व्यापारी/व्यवसायीले राजनितिक नेतृत्वमा रहेका व्यक्तिसँगको भेटघाटमा जाँदा बैंकहरूले १८ प्रतिशतसम्म ऋणको ब्याज असुल गरिरहेको र लगानीको वातावरण नभएको भन्ने गरेको बताए । ‘उच्च राजनितिक भेटघाटमा जाँदा हामीलाई बैंकले महंगो ब्याज लिइरहेको भनेर व्यापारी, व्यवसायी, उद्योगीले भन्ने गरेका छन् । जुन कुरामा सत्यता छैन,’ उनले भने, ‘यस्ता भ्रामक कुराले बजारमा अराजकता फैलिएको छ ।’
उनले कुनै बैंकले १८ प्रतिशत ब्याज लिएको प्रमाण भए राष्ट्र बैंकमा आएर उजुरी गर्न पनि आग्रह गरे । पहिले नै ६ प्रतिशत ब्याजदरमा ‘लक’ भएको ऋणको अहिले पनि त्यो नबढेको उनको दाबी छ ।
बाणिज्य बैंकहरूको संरक्षण गरेको भन्ने आरोप लाग्ने गरेको भए पनि वास्तवमा नागरिकले बैंकमा बचत गरेको पैसाको सुरक्षाका लागि राष्ट्र बैंकले भूमिका खेल्ने गरेको उनको भनाइ छ । ऋणीले योजना नबनाई ऋण लिई उत्पादनमुलक क्षेत्रमा लगानी गर्न नसकेका कारण उनीहरू समस्यामा पर्ने गरेको उनको आरोप छ ।
रेमिट्यान्समा भएको सुधारसँगै पर्यटन क्षेत्र कोभिड–१९ अघिकै अवस्थामा फर्किन लागेकाले अर्थतन्त्रमा क्रमशः सुधार हुँदै जाने विश्वास बढेको पनि अधिकारीले बताए । पछिल्लो समय डिजिटल माध्यममा विज्ञापन गर्ने क्रम बढेकाले नेपालका सञ्चारगृह मारमा परेको बताउँदै उनले यसले देशको राजश्व प्रभावित भएको बताए ।
नेपाल बैंकर्स एसोसिएशनका अध्यक्ष एवं एनएमबी बैंकका प्रमुख कार्यकारी अधिकृत सुनिल केसीले सडकबाट भइरहेको बिरोध र आक्रमणले बैकिङ क्षेत्र त्रसित बनेको बताए । उनले देशभरका ७५३ वटै स्थानीय तहसम्म पुगेर सेवा दिइरहेका बैंकहरू विरुद्ध आक्रमण हुँदा नागरिकको विश्वसनियतामा धक्का लाग्ने बताए ।
‘बैंकिङ क्षेत्रले अहिलेसम्म १७ सय खर्ब रुपैयाँ बढी लगानी उत्पादनमुलक क्षेत्रमा गरेको छ,’ उनले भने, ‘नवीकरणीय ऊर्जामा मात्रै पनि ३ सय अर्ब लगानी भएको छ । ’ उनले बैंकहरूले जलविद्युत उत्पादनमा लगानी गरेकै कारण आज नेपालको विद्युत भारतीय बजारमा बिक्री भइरहेको उनको भनाइ छ । उनले नेपालको जलविद्युत उत्पादन अझै बढाउन ठूला आयोजनामा प्रत्यक्ष वैदेशिक लगानी भित्र्याउनु पर्ने उनले आवश्यकता औंल्याए । प्रत्यक्ष वैदेशिक लगानी भित्र्याउन धेरै नीतिगत व्यवधान रहेकाले त्यसलाई परिमार्जन गरी विदेशीलाई लगानीका लागि बोलाउनु पर्ने उनको भनाइ छ ।
नेपाल उद्योग परिसंघका अध्यक्ष राजेश अग्रवालले अझैपनि नेपालको अर्थतन्त्र संकट ग्रस्त अवस्थामा रहेको बताए । सरकारले देशमा भइरहेको आर्थिक संकटको अवस्थालाई मनन नै गर्न नखोजेको उनको आरोप छ ।
‘अर्थतन्त्र संकटमा हुँदा पनि सरकारले यसलाई अहिलेसम्म स्वीकार गरेको छैन । सुधारोन्मुख छ मात्रै भनिएको छ । यति त्यसो हो भने सरकारले हरेक त्रैमासको आर्थिक वृद्धिदरको तथ्यांक सार्वजनिक गर्दैन,’ उनले भने ।
उनले अर्थतन्त्र अहिलेपनि ऋणात्मक अवस्थाबाट नै गुज्रिरहेको हुँदा सरकारले आर्थिक वृद्धिदरको तथ्यांक सार्वजनिक गर्न नसकेको उनको आरोप छ ।
