नेपाल पूर्वाधार 
दैलेख । दैलेखको दुर्गम मानिएको महावु गाउँपालिकाको वडा नं ४ को काप्रीखोला र ५ को काँशिकाध जोड्ने पक्की पुल नबन्दा स्थानीयले सास्ती भएको छ । निर्माण कम्पनीको लापरवाहीका कारण समयमै पुन नबन्दा आवागमनमा सास्ती भएको स्थानीय बताउँछन् । दैनिक पाँच सयभन्दा बढी नागरिक आवतजावत गर्ने उक्त पुल निर्माणमा ढिलाइ हुदाँ वर्षाको समयमा काप्रीखोला र काँशिकाधमा आवागमनमा समस्या हुने गरेको छ । यहाँका नागरिकले बिरामी पर्दा समेत तुरुन्तै स्वास्थ्य संस्थामा पुर्याउन नसकिने उनीहरुले बताए ।
‘सधैँभरि सास्ती भोगेका यहाँका बासिन्दा पक्की पुल बनेपछि सहज यात्रा गर्ने आसमा थिए । यात्रा सहज हुनुभन्दा झन वर्षामा सास्ती हसने गरेको छ’, महावु–५ का वडाध्यक्ष दीपबहादुर शाहीले भने, ‘ठेकादारको गैरजिम्मेवारीका कारण यहाँका सडक, स्वास्थ्य भवनको काम प्रभावकारी भएको छैन । पक्की पुल तथा विद्युत्का पोल अलपत्र अवस्थामा छन् ।’ निर्माण कम्पनीले काम सम्पन्न नगरे यहाँका नागरिकले आन्दोलनमा उत्रने चेतावनी दिएका शाहीको भनाइ थियो । उनका अनुसार तीन करोड २५ लाख रुपैयाँमा निर्माण गर्नुपर्ने उक्त पुलमा हालसम्म एउटा मात्र पिलर निर्माण गरिएको छ ।
पुल, स्वास्थ्य भवनलगायत पूर्वाधार समय सम्पन्न गर्न भन्दै निर्माण कम्पनीका प्रतिनिधि कुलबहादुर वलीलाई छ पटक पत्र पठाइसकिएको पूर्वाधार विकास कार्यालयले जनाएको छ । अन्तिमपटक म्याद थपको तयारी गरिएको भन्दै अब पनि काम नगरे कालोसूचीमा राख्नका लागि सिफारिस गर्ने तयारी भइरहेको कार्यालयका इन्जिनियर पारस डाँगीले बताए । ‘दुर्गममा बिजुली पुर्याउने भन्दै लगिएका बत्तीको पोल बाटोमा लथालिङ्ग अवस्थामा छन्’, वडा नं ४ का वडाध्यक्ष रामबहादुर शाहीले भने, ‘बारम्बार भनेका छौँ । हामीले भनेको ठेकेदारले सुनुवाइ गर्दैन । सडक, पुल, विद्युत्का पोललगायत संरचनाका कारण स्थानीयलाई आवागमनमा सास्ती भएको छ ।’
