नेपाल पूर्वाधार 
काठमाडौं । बाणिज्य बैंकहरूले ऊर्जा क्षेत्रका परियाेजनामा गरेको ऋण लगानी २ खर्ब ६८ अर्ब ७७ करोड रुपैयाँ पुगेको छ । बाणिज्य बैंकहरूले गत जेठ मसान्तसम्मको अवधिमा ऊर्जा क्षेत्रका पूर्वाधार परियोजना निर्माणमा यति कर्जा प्रवाह गरेका हुन् ।
नेपाल राष्ट्र बैंकले आइतबार सार्वजनिक गरेको आर्थिक वर्ष २०८०/८१ को मौद्रिक नीतिमा गरिएको अघिल्लो आर्थिक वर्ष (२०७९/८०) को समिक्षामा जेठ मसान्तसम्ममा ऊर्जाको क्षेत्रमा प्रवाह भएको कर्जा २ खर्ब ६८ अर्ब ७७ करोड रुपैयाँ पुगिसकेको जनाइएको छ । बाणिज्य बैंकहरूले प्रवाह गरेको यो कर्जा जलविद्युत, सौर्य ऊर्जा एवं वैकल्पिक ऊर्जाको क्षेत्रमा लगानी भएको छ ।
राष्ट्र बैंकका अनुसार बाणिज्य बैंकहरूबाट ऊर्जा क्षेत्रमा प्रवाह भएको यो कूल कर्जाको ६.८ प्रतिशत हो । बाणिज्य बैंकहरूले ऊर्जामा गरेको लगानीको ठूलो हिस्सा जलविद्युतमा छ ।
यस्तै, विकास बैंकहरूबाट कृषि, लघु, घरेलु तथा साना उद्योग एवं ऊर्जा र पर्यटन क्षेत्रमा गरी कूल कर्जाको २४.९ प्रतिशत हुन आउने १ खर्ब १३ अर्ब १८ करोड रुपैयाँ रुपैयाँ कर्जा प्रवाह भएको राष्ट्र बैंकले जनाएको छ । कर्जा प्रवाहको वर्तमान अवस्था समेतको विश्लेषणको आधारमा तोकिएका क्षेत्रमा कर्जा लगानी गर्नुपर्नेसम्बन्धी विद्यमान व्यवस्थामा आवश्यक पुनरावलोकन गरिने पनि राष्ट्र बैंकले नीति लिएको छ ।
यसैगरी, आर्थिक वर्ष २०८०/८१ मा करिब ९ सय मेगावाट विद्युत राष्ट्रिय प्रसारण ग्रिड प्रणालीमा थपिने र गत असार ११ गते थप ३ सय मेगावाट विद्युत भारतीय बजारमा बिक्री गर्न अनुमति पाइएकाले यो आवमा ९५२ मेगावाट विद्युत निर्यात गरी भारतसँगको व्यापार घाटा कम गरी बाह्य क्षेत्रमा सुधार ल्याउन र आन्तरिक अर्थतन्त्रलाई चलायमान बनाउन सहयोग पुग्ने मौद्रिक नीतिमा भनिएको छ ।
