नेपाल पूर्वाधार 
काठमाडौं । जलविद्युत विकासमा लगानी गर्ने उद्देश्यले स्थापित हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआइडिसिएल) ले दिगो ऊर्जाका लागि वित्त (फाइनान्स फर सस्टेन्एवल इनर्जी) नारा अघि बढाएको छ ।
कम्पनीले आफ्नो १२ औ बार्षिकउत्सवको अवसरमा सो नारा अघि सारेको हो । नाराको सार्वजनिक गर्दै ऊर्जा, जलस्रोत तथा सिञ्चाई मन्त्रालयका सचिव एवं कम्पनी सञ्चालक समितिका अध्यक्ष दिनेशकुमार घिमिरेले स्वच्छ र हरित ऊर्जा प्रवद्र्धनका लागि कम्पनीले नयाँ नारा अघि सारेको र अब कम्पनीले यसमा लगानी गर्ने बताए । हालसम्म ५१ अर्ब बराबरको लगानी प्रतिवद्धता गरिसकेको बताउँदै उनले नेपालमा उत्पादित बिजुली छिमेकी राष्ट्रहरुमा व्यापार हुनु यस क्षेत्रका लागि सकारात्मक भएको बताए ।
राष्ट्रिय प्राकृतिक स्रोत तथा वित्त आयोगका अध्यक्ष एवं कम्पनीका संस्थापक अध्यक्ष बालानन्द पौडेलले ऊर्जामा लगानी अभाव भईरहेको बेला लगानीमै समर्पित संस्थाको रुपमा अघि बढ्नुपर्ने बताए ।
कम्पनीका प्रमुख कार्यकारी अधिकृत अर्जुनकुमार गौतमले १८ वटा जलविद्युत आयोजनामा कूल २१ अर्ब २ करोड रुपैयाँ ऋण तथा १२ जलविद्युतसँग सम्बन्धित कम्पनी तथा आयोजनाहरूमा करिब ५ अर्ब ३४ करोड सेयर लगानी सहित ३० वटा आयोजनामा २६ अर्ब ३६ करोड लगानी पुगेको जानकारी दिए । उनका अनुसार, आर्थिक वर्ष २०७९÷८० मा सेयर लगानीतर्फ ५९ करोड र ऋण लगानीतर्फ २ अर्ब ८६ करोड गरी ३ अर्ब ४५ करोड रुपैयाँ थप लगानी प्रवाह भएको छ भने १ अर्ब ४४ करोड खुद मुनाफा हुने अनुमान गरिएको छ । जुन अघिल्लो आर्थिक वर्षको तुलनामा ५२ प्रतिशतले बढी हो ।
नेपाल विद्युत प्राधिकरणका कार्यकारी निर्देशक कुलमान घिसिङले कम्पनीको धेरै जलविद्युत आयोजनामा लगानी गर्न सुरु गरिएको बताउँदै यसले जलविद्युत आयोजना विकासमा सहयोग पुग्ने बताए । निजी प्रर्वद्धक भानु पोखरेलले कम्पनीले निजी क्षेत्रले निर्माण गरेका आयोजनालाई विशेष प्राथमिकता दिनुपर्ने बताए ।
