नेपाल पूर्वाधार 
काठमाडाैं । पूवार्धार परियाेजनाकाे लागि अत्यावश्यक विस्फोटक पदार्थको व्यवस्थापनबारे स्वतन्त्र उर्जा उत्पादकहरूकाे संस्था नेपाल (इप्पान) र नेपाली सेनाबिच आइतबार उपलब्धीमूलक छलफल भएको छ । छलफलमा आवश्यक परेमा ऊर्जा परियोजनाहरुले विस्फोटक पदार्थ एक–अर्को आयोजनाबाट सरसापटी लिन सक्ने सहमति भएको छ ।
यसअघि यस्तो व्यवस्था नहुदा कुनै परियोजनामा विस्फोटक पदार्थ अभाव भएमा अर्को परियोजनाबाट सापटी लिएर चलाउन सकिदैनथ्यो । फलतः सम्बन्धित परियोजनाको विस्फोटक पदार्थ नआएसम्म काम ठप्प हुने गरेको थियो । यस्तो समस्या समाधानको लागि ईप्पानले लामो समयदेखि नेपाली सेनासँग पहलकदमी गर्दै आएको थियो ।
यस्तो समस्या कुनै आयोजनाहरुलाई परेको भए तत्कालै आफ्नो आयोजना नजिकको नेपाली सेनाको कार्यालयमा विबरण उपलब्ध गराएमा समस्याको हल गरिदिनेबारेमा पनि नेपाली सेनाले सहमति जनाएको छ ।
छलफलमा विस्फोटक पदार्थको ढुवानी र भण्डारणमा थप सहज बनाउन सेनाले सहजीकरण गर्ने बारेमा पनि सहमति भएको छ । छलफलमा ईप्पानका तर्फबाट सचिव बलराम खतिवडा र कोषाध्यक्ष आनन्द चौधरी सहभागी थिए ।