नेपाल पूर्वाधार 
काठमाडौं । सरकारले सिन्धुपाल्चोकमा निर्माणाधीन ३५ मेगावाटको न्यासिम खोला जलविद्युत आयोजनामा स्थानीय समूहबाट भएको तोडफोड तथा आगजनीको घटनाबारे अध्ययन गर्न छानबिन समिति गठन गरेको छ । गृह मन्त्रालयले गत फागुन १९ गतेको प्रधानमन्त्री एवं गुहमन्त्रीस्तर निर्णय बमोजिम घटनाबारे सहसचिव सुमन घिमिरेको संयोजकत्वमा ६ सदस्यीय छानबिन समिति गठन गरेको हो ।
छानबिन समितिका अन्य पदाधिकारीमा ऊर्जा, जलस्रोत तथा सिँचाइ मन्त्रालयका सिनियर डिभिजनल इन्जिनियर बाबुराज अधिकारी, सिन्धुपाल्चोकका प्रमुख जिल्ला अधिकारी नीराजन श्रेष्ठ, उपत्यका प्रहरी कार्यलय रानीपोखरीका प्रहरी उपरीक्षक बासुदेव खतिवडा छन् । स्वतन्त्र ऊर्जा उत्पादकहरूको संस्था, नेपाल (इपान) का उपाध्यक्ष गणेश कार्की र गृह मन्त्रालयकी उपसचिव कल्पना घिमिरे पनि छानबिन समिति सदस्य छन् ।
समितिले जुगल गाउँवालिकाको वडा नम्बर–३ मा सीता हाइड्रोपावर कम्पनीले निर्माण गरिरहेको आयोजनामा अपराधिक समूहले आगजनी, तोडफोड गरी कर्मचारीमाथि समेत सांघातिक आक्रमण गरेको घटनाको सम्बन्धमा छानबिन गर्ने मन्त्रालयले जनाएको छ । समितिले जलविद्युत आयोजनामा सांघातिक आक्रमण गर्ने जस्तो आपराधिक क्रियाकलामा संलग्नलाई कानूनी कारबाहीको दायरामा ल्याउन तथा क्षतिपूर्ति एवं शान्ति सुरक्षाको व्यवस्था गर्ने सम्बन्धमा सुझाव सहितको प्रतिवेदन पेश गर्नुपर्ने छ ।
गाउँमा विद्युतीय दुर्घटनामा परी एक जना बालिकाको मृत्यु भएपछि आक्रोशित स्थानीयको भीडले गत फागुन १५ गते निर्माणाधीन आयोजना तथा काम गर्ने कर्मचारीमाथि सांघातिक आक्रमण गरेको थियो । आक्रमणमा परी आयोजनामा कार्यरत ७ जना घाइते भएका थिए ।
अनियन्त्रित भीडले आयोजनामा जथाभावी तोडफोड तथा आगजनी गर्न थालेपछि प्रहरीले समेत नियन्त्रण गर्न सकेको थिएन । स्थानीयको भीडले गरेको आक्रमणबाट आयोजनालाई १२ करोड रुपैयाँ बढीको आर्थिक क्षति भएको प्रवर्द्धक कम्पनीको दाबी छ ।
