नेपाल पूर्वाधार 
काठमाडौं । दीगो गतिशीलताको लागि एकिकृत यातायातसम्बन्धी दोस्रो अन्तर्राष्ट्रिय सम्मेलन १५ बुँदे संकल्प पत्र घोषणा गर्दै शनिवार सम्पन्न भएको छ ।
सम्मेलनले सबै प्रकारका यातायातका माध्यमहरुलाई एकिकृत गर्नुपर्नेमा जोड दिएको छ । सार्वजनिक यातायातको साथै नन–मोटराइज्ड (साइक्लिङ, वाकिङ) माध्यमलाई पनि समावेस गरी पहुँच उपलब्ध गराउनुपर्ने संकल्प पत्रमा उल्लेख छ । सम्मेलनले यातायातका विविध माध्यमहरुलाई एकिकृत यातायात गुरुयोजनामार्फत पूर्ण र प्रभावकारी बनाउनुपर्ने घोषणा गरेको छ ।
त्यस्तै, अहिले स्थानीय पूर्वाधार विभाग, सहरी विकास, स्थानीय तह र सडक विभागले निर्माण गर्ने सडकहरुको मापदण्डमा अन्तर रहेको छ । अबदेखि उही प्रकृति र सूचीमा परेका सडकको एउटै मापदण्ड कायम गर्नुपर्नेमा जोड दिएको छ । यसले मात्र सुरक्षित सडक सञ्जाल विकास गर्न, मर्मत खर्च घटाउन र सडकको रेखांकनमा एकरुपता ल्याउन सहयोग पुग्ने संकल्प पत्र घोषणा समितिका अध्यक्ष सरोजकुमार प्रधानले बताए ।
यसैगरी एकिकृत र दीगो गतिशीलताको लागि राष्ट्रिय र अन्तर्राष्ट्रिय सरोकारवाला निकायसँग सहकार्य र सहयोग वृद्धि गर्नुपर्नेमा जोड दिएको छ । ‘विशेषगरी सरकारी निकाय, प्राज्ञिक, निजी, नागरिकतहमा सहकार्य गर्नुपर्नेछ’ उनले भने ।
सम्मेलनले वातावरणमैत्री, न्यून कार्वन उत्र्सजन गर्ने विद्युतीय सवारी साधनको प्रयोगलाई प्राथमिकता दिनुपर्ने र हाइड्रोजन उत्पादनबारे पनि अनुसन्धानलाई अघि बढाउनुपर्ने संकल्प पत्रमा उल्लेख छ ।
दीगो यातायात पूर्वाधारमा लगानी वृद्धि गर्नुपर्ने, न्यून कार्वन उत्र्सजन गर्ने यातायातका साधन प्रयोगलाई प्रवद्र्धन गर्न शिक्षा, जनचेतना वृद्धि गर्नुपर्नेमा सम्मेलनले जोड दिएको छ । यसले स्वास्थ्यमा हुने सुधार, वायु प्रदुषणमा आउने कमी महत्वपूर्ण हुनेछ ।
संकल्प पत्र प्राज्ञिक क्षेत्रमा मात्र नभइ नीतिनिर्माण तहको लागि पनि महत्वपूर्ण हुने सोसाइटी अफ ट्रान्सपोर्ट इञ्जिनियर्स नेपालका अध्यक्ष पदमबहादुर शाहीले बताए ।
सम्मेलन समापन समारोहमा बोल्दै सहरी विकास मन्त्री विक्रम पाण्डेले सडक निर्माण पूर्वाधारको पनि पूर्वाधार भएकैले सरकारले उच्च प्राथमिकता दिएको बताए । ‘सडकको पहुँच हुनु मात्र पूर्ण नभएको बरु सहज सेवा र उपभोक्ताको सन्तुष्टि महत्वपूर्ण छ’ उनले भने ।
सम्मेलनले पारित गरेको संकल्प पत्र नयाँ ऐन, नियम र निर्देशिका निर्माण गर्नको लागि महत्वपूर्ण हुने र सम्मेलनले गरेको घोषणाले मन्त्रालय लाभान्वित मन्त्री पाण्डेले विश्वास व्यक्त गरे ।
