नेपाल पूर्वाधार 
काठमाडौं । सुदूरपश्चिम प्रदेशको कालंगा बेसिनमा निर्माण सम्पन्न १५.३३ मेगावाटको कालंगागाड जलविद्युत आयोजनाबाट विद्युत उत्पादन सुरु भएको छ । प्रवर्द्धक कालंगा हाइड्रो लिमिटेडले निर्माण गरेको आयोजना गत शुक्रबारबाट १३२ केभी बलाँच सबस्टेसनमा जोडिएको हो ।
आयोजनाको विद्युतगृहदेखि बलाँच सबस्टेसनसम्म ३७.८५ किलोमिटर लामो १३२ केभी प्रसारण लाइनको सफल परीक्षणपछि आयोजनाको विद्युत प्रणालीमा प्रवाह गर्न सुरु गरेको कम्पनीका सञ्चालक पुष्प चित्रकारले बताए । उनका अनुसार आयोजनाको जडित क्षमता १५.३३ मेगावाट भए पनि नदीमा पानीको बहाव कम रहेकाले अहिले ५ मेगावाट विद्युत मात्रै प्रणालीमा गइरहेको छ ।
‘नेपाल विद्युत प्राधिकरणको प्राविधिक टोलीले प्रसारण लाइन परीक्षण गरेपछि कालंगागाडबाट विद्युत उत्पादन सुरु भएको छ । अहिले हामीले आन्तरिकरूपमा आयोजना परीक्षण गरेर विद्युत उत्पादन सुरु गरेका छौं । प्राधिकरणको टोलीले केही दिनमै आएर हेर्नेछ ।’ उनले अहिले जडित क्षमताभन्दा कम विद्युत उत्पादन भइरहेकोमा चैत लागेपछि हिउँ पग्लिएर बढ्दै जाने पनि बताए ।
प्राधिकरणको बलाँच सबस्टेसनसम्म पुर्याउने प्रसारण लाइनको संरचना तयार भइसकेकाले अब ३८.४६ मेगावाटको माथिल्लो कालंगागाड आयोजनाबाट विद्युत उत्पादन सुरु गर्ने तयार थालिएको चित्रकारले जानकारी दिए ।
‘माथिल्लो कालंगागाड पनि अब विद्युत उत्पादनका लागि तयारी अवस्थामा छ । हामीले आयोजनाको संरचनामा पानी भर्न सुरु गरिसकेका छौं । अबको २ दिनमा परीक्षण थाल्छौं’ उनले भने । उनका अनुसार यो आयोजनाबाट विद्युत उत्पादन सुरु हुन करिब एक साताको समय लाग्नेछ ।
३८.४६ मेगावाटको आयोजना भएपनि सुख्खा याम भएकाले प्रसारण प्रणालीमा आउँदा १३ मेगावाट विद्युत उत्पादन हुने उनले बताए । अर्को १०.७ मेगावाटको सानिगाड जलविद्युत आयोजना भने बैशाखसम्मको समय लाग्ने देखिएको छ ।
कालंका बेसिनमा एउटै समूहले छुट्टा छुट्टै कम्पनी खडा गरी एकसाथ ३ जलविद्युत आयोजना निर्माण गरेको हो । यी आयोजनामा ११ अर्ब रुपैयाँभन्दा बढी लगानी भएको छ । यी आयोजना निर्माण सम्पन्न भई सञ्चालनमा आउँदा सूदुर पश्चिम प्रदेशको विद्युतीकरणमा सहयोग पुग्नुका साथै, त्यस क्षेत्रको आर्थिक समृद्धिमा पनि योगदान पुग्नेछ ।
सबै आयोजनामा सिभिल तथा हाइड्रोमेकानिकलतर्फको काम नेपालकै सुनाम इन्फ्रास्ट्रक्चर निर्माण प्रालिले गरिरहेको छ । यो निर्माण कम्पनीले ५७ मेगावाटको नुप्चे लिखु जलविद्युत आयोजनाको सिभिल संरचनाको काम पनि गरिरहेको छ ।
