नेपाल पूर्वाधार 
काठमाडाैं । चालू वर्षकाे शरद ऋतुमा हिमाल आरोहण गर्न १ सय ८ आरोही समूहका ९ सय एक आरोहीले आरोहण अनुमति लिएका छन् । याे समयमा विश्वकाे सर्वाेच्च शिखर सगरमाथा, मनास्लु, कञ्चनजंगालगायत ३५ हिमाल तथा चुली आरोहणका लागि आरोहीले अनुमति लिएका हुन् ।
अनुमति लिनेहरू अहिले हिमाल तथा चुली आरोहणका लागि धमाधम आइरहेकाे पर्ययटन विभागले जनाएकाे छ । विभागका अनुसार याे अवधिमा सबैभन्दा बढी मनास्लु आरोहणका लागि ३८ आरोही समूहका ४ सय ४ आरोहीले आरोहण अनुमति लिएका छन् ।
विभागको पर्वतारोहण शाखाको विवरणमा सगरमाथा आरोहणका लागि एक समूहका ५ आरोहीले अनुमति पाएका छन् । अमादब्लङ (६,८१४ मिटर) हिमाल आरोहणका लागि ११ आरोही समूहका १ सय ३१ ले अनुमति पाएका छन् ।
यस्तै, हिम्लुङ हिमालका (७,१२६ मिटर) मा १४ आरोही समूहका एक सय ४४ ले आरोहण अनुमति लिएका छन् । धौलागिरि (८, १६७ मिटर) आरोहणका लागि ४ आरोही समूहका ३४, नुप्से (७,८५५) आरोहणका लागि एक समूहका आरोहीले अनुमति लिएका छन् ।
अमादब्लङलगायत मिहाल आरोहणका लागि अहिले पनि आरोहण अनुमति जारी भइरहेको विभागले जनाएको छ । यस सिजनमा हिमाल आरोहणबाट हालसम्म ७ करोड १० लाख ३१ हजार ६ सय ४७ रुपैयाँ राजश्व संकलन भएको विभागले जनाएको छ ।
हिमाल आरोहणका लागि हालसम्म नेपालसहित ६८ मुलुकका ९ सय एक आरोही नेपाल आएका हुन् । विभागका महानिर्देशक होमप्रसाद लुइँटेलले आरोहण धमाधम चलिरहेको जानकारी दिए ।
उनले अहिले पनि केही हिमालमा आरोहण अनुमति जारी भइरहेको बताए । उनका अनुसार मनास्लु आरोहण लगभग सकिएको छ । तर, के–कति सङ्ख्यामा आरोही मनास्लुको चुुचुरोमा पुगे भन्ने विस्तृत विवरण आइसकेको छैन ।
अघिल्ला वर्षमा झै यो वर्ष पनि मनास्लु आरोहणमा आरोहीको आकर्षण देखिएको छ । विश्वको आठौं अग्लो र नेपालको साताैं अग्लो मनास्लु हिमाल आरोहणका लागि सर्वाधिक सङ्ख्यामा आरोही गएका हुन् ।
शरद ऋतु मनास्लु आरोहणका लागि उपयुक्त मौसम मानिने भएकाले सर्वाधिक आरोहीको रोजाइमा पर्ने गरेको नेपाल पर्वतारोहण सङ्घले जनाएको छ । सेभेन सम्मिट ट्रेक्स प्रालिका प्रबन्ध निर्देशक मिङ्मा शेर्पाले यो सिजनमा पनि धेरै सङ्ख्यामा आरोही मनास्लु आरोहणमा गएको बताए ।
उनले दिएको जानकारी अनुसार यस सिजनको मनास्लु आरोहण करिब अन्तिम चरणमा छ । अधिकांश आरोही आरोहण सकेर फर्किनेक्रममा छन् । उपयुक्त मौसम मानिएकाले हरेक वर्ष मनास्लु आरोहणमा सर्वाधिक आरोही आउने गरेका प्रबन्ध निर्देशक शेर्पाको भनाइ छ ।
सन् १९५६ मे ९ तारिखमा जापानी नागरिक तोसियो इमनिसी र नेपाली ग्याल्जेन नोर्बु शेर्पाले आठ हजार १६३ मिटर अग्लो मनास्लुको सफल आरोहण गरेका थिए।
