नेपाल पूर्वाधार 
तनहुँ । ऋषिङ गाउँपालिका–१ झापुटारमा निर्माणाधीन १४० मेगावाटकाे तनहुँ जलाशय जलविद्युत् आयोजनाको ५५ प्रतिशत निर्माण पूरा भएकाे छ ।निर्माणाधीन आयोजनाकाे आधाभन्दा बढी निर्माण पूरा भएकाे हाे ।अहिले ३ वटै प्याकेज (चरण) का कार्यलाई तीव्रता दिइएकाे आयाेजनाले जनाएकाे छ । प्याकेज–१ मा ३५ प्रतिशत निर्माण सम्पन्न भएकाे छ ।
यस्तै, प्याकेज–२ मा ५५ प्रतिशत र प्याकेज–३ अन्तर्गत ७३ प्रतिशत कार्य प्रगति भइसकेको आयोजनाकाे प्रवर्द्धक तनहुँ हाइड्रोपावर कम्पनीका प्रबन्ध सञ्चालक किरणकुमार श्रेष्ठले बताए । उनका अनुसार प्याकेज–१ र २ मा निर्माण धमाधम भइरहेको छ । प्याकेज–३ मा प्रसारण लाइनका लागि रुख कटानकाे काम अगाडि बढ्न नसक्दा निर्माण प्रभावित भएको उनले बताए ।
तनहुँको तुलनामा चितवन खण्डमा सालका ठूला रुख कटान गर्नुपर्ने र केन्द्रीयस्तरबाट रुख कटानको आदेश नभएसम्म काम अघि बढाउन नसक्ने उनले बताए । तनहुँ आयाेजनाकाे विद्युत प्रवाह हुने २२० केभी दमौली-भरतपुर डबल सर्किट ३४.७ किलोमिटर प्रसारण लाइनको काम अगाडि बढाइएको थियो
प्रसारण लाइनकाे रुटमा पर्ने कूल ९४ वटा टावरमध्ये ७६ वटा टावरको फाउण्डेसन कार्य सम्पन्न भएको छ । ५६ वटा टावर पनि बनाइसकिएको छ । याे प्रसारण लाइन निर्माणका लागि केइसी इन्टरनेशनल लिमिटेड भारतले ठेक्का सम्झौता गरी काम सुरु गरेको थियो । निर्माण सम्पन्न गर्ने सम्झौता अवधिसमेत समाप्त भइसकेको सो आयोजनाले जनाएको छ ।
कम्पनीको पुँजी संरचना तथा वित्तीय व्यवस्थापन आयोजनाको कूल लागत (प्रसारण लाइन, ग्रामीण विद्युतीकरण तथा निर्माण अवधिको ब्याज समेत) ५० करोड ५० लाख अमेरिकी डलर रहेको छ । जसमा एडिबीले १५ करोड, जापान अन्तर्राष्ट्रिय सहयोग नियोग (जाइका)ले १८ करोड ४० लाख, युरोपियन लगानी बैंकले आठ करोड ५० लाख र नेपाल सरकार,नेपाल विद्युत प्राधिकरणले आठ करोड ६० लाख डलर बेहोर्ने गरी वित्तीय व्यवस्थापन गरिएको छ ।
