नेपाल पूर्वाधार 
काठमाडौं । आगामी जेठ ३२ गते हुने २१औं साधारणसभाबाट स्वतन्त्र ऊर्जा उत्पादकहरूको संस्था, नेपाल (इपान) मा नयाँ कार्यसमिति आउँदैछ । जलविद्युत उत्पादकहरूको छाता संस्थाको रूपमा रहेको इपानको नयाँ कार्यसमिति चयनका लागि अहिलेबाट स्वतन्त्र ऊर्जा उत्पादकहरूबीचमा चुनावी रौनक सुरु भएको छ ।
यस पटक चुनाबी प्रतिश्पर्धामा उत्रिने केही उमेद्वारले आफ्नो उमेद्वारी घोषणा नै गरिसकेका छन् भने केही गर्ने क्रममा छन् । अध्यक्ष पदका लागि हालका उपाध्यक्ष गणेश कार्की र किरण मल्ल प्रबल दावेदारकोरूपमा मैदानमा उत्रिएका छन् । मल्लले आफ्नो प्रचार–प्रसार तीव्र पारेपनि कार्की अहिलेसम्म खुल्लारूपले प्रचार–प्रसारमा उत्रिएका छैनन् । कार्की पक्ष सर्वसहमतिबाट जाने पक्षमा रहेकाले पनि उनले खुल्लारूपमा प्रचार प्रसार गरेका छैनन् ।
यसैगरी बरिष्ठ उपाध्यक्षमा अहिले उपाध्यक्ष रहेका मोहन डाँगीको चर्चा छ । सुरुवातमा अध्यक्ष पदका लागि कार्की, डाँगी, मल्ल र आशिष गर्गले चासो देखाएपनि गर्गले हालसम्म कुन पदमा उमेद्वारी दिने भन्ने औपचारिक रूपमा सार्वजनिक गरिसकेका छैनन । डाँगीले यस पटक कार्कीलाई अध्यक्ष बनाएर आफु बरिष्ठ उपाध्यक्ष बनेर आगामी कार्यकालका लागि अध्यक्ष बन्ने गरी सहमति जनाएका छन् ।
कार्कीका अनुसार, डाँगी बरिष्ठ उपाध्यक्षका लागि सहमत भइसकेका छन् । गर्ग र हाल महासचिव रहेका गोरे शेर्पाको पनि बरिष्ठ उपाध्यक्ष पदमा दाबी रहने भन्ने सुन्नमा आएको छ । तर, उनीहरू दुवैले अहिलेसम्म सार्वजनिकरूपमा प्रतिस्पर्धामा उत्रिने घोषणा गरिसकेका छैनन् ।
यसैगरी, ५ जना उपाध्यक्षका लागि आनन्द चौधरी, भरत खत्री, राम आचार्य, उत्तम ब्लोन र हिम पाठकको दाबी रहने चर्चा छ । महासचिव पदमा हाल सचिव रहेका बलराम खतिवडा र उप–महासचिवमा अहिले सदस्य रहेका प्रकाशचन्द्र दुलालले उमेद्वारी दिने तयारी गरेका छन् ।
यसैगरी ५ जना सचिवमा भरत खड्का, विक्रम विष्ट, अविज्ञा मल्ल, कविता कँडेल तथा कोषाध्यक्षमा नरेन्द्र बल्लभ पन्त लगायत चुनावी प्रतिश्पर्धामा उत्रिने चर्चा छ । सदस्यहरूमा शंकर बस्स्याल, मिथुन पौडेल, कुवेरमणि नेपाल, सुमन जोशी, कदम केसी, सुसन कर्माचार्य लगायतको नाम चर्चा छ ।
हेभिवेटलाई समेट्न प्रयास
‘हेभिवेट’ व्यक्तित्वको रूपमा चिनिने स्वतन्त्र ऊर्जा उत्पादकहरूलाई पनि सदस्य बनाएर इपानको नयाँ कार्य समितिलाई साझा र ओझिलो संस्थाको रूपमा अघि बढाउने प्रयास अघि बढाइएको छ । इपानका सल्लाहकार तथा प्रभुुद्ध व्यक्तित्वहरूले ‘समय र काम गर्ने पदाधिकारी, विज्ञ र हेभिवेट सदस्य’ सहितको बलियो, साझा र दरिलो इपानका लागि प्रयास अघि बढाएका हुन् ।
यस अभियानमा संलग्न एक ऊर्जा प्रवद्र्धकका अनुसार, समय कम दिन सक्ने तर, विषयगत क्षेत्रमा लामो अनुभव भएका र विज्ञको रूपमा परिचित ती ऊर्जा प्रवद्र्धकहरूलाई यसमा समेट्ने कोशिस अघि बढाइएको छ ।
उनका अनुसार, ऊर्जा क्षेत्रमा अनुभवी विज्ञ र अग्रजको रुपमा परिचित उत्तमकुमार श्रेष्ठ, कुमार पाण्डे, भानु पोखरेल, राजेश श्रेष्ठ, अर्जुन गौतम,अनुप आचार्य, टीएन आचार्य, ध्रुव उप्रेती लगायतको नाम चर्चामा छ । यो अभियान सफल भए इपानको समग्र पहिचान र स्तर उच्च हुने भएपनि यो अभियान शसक्त रुपमा भने अघि बढ्न सकेको छैन ।
