नेपाल पूर्वाधार 
काठमाडौं । डेडिकेटेड फिडर तथा ट्रंकलाइन प्रयोग गरेर पहिलो किस्ता तिरेका उद्योगीहरुले धमाधम बक्यौताको दोस्रो किस्ता तिर्न थालेका छन् ।
अशोक स्टील,हुलास र हामा स्टीलले दोस्रो किस्ता तिरेका हुन् । अशोक स्टीलले ६३ लाख रुपैयाँ, हुलास स्टीलले ५० लाख ४३ हजार रुपैयाँ र हामा स्टीलले २० लाख ८९ हजार रुपैयाँ तिरेका छन् । सोही बराबरको रकम पहिलो किस्ताबापत तिरेका थिए ।
सर्वोत्तम सिमेन्ट र लक्ष्मी स्टीलले पनि बक्यौताको दोस्रो किस्ता तिरेका छन् । लक्ष्मी स्टीलको १९ करोड ३ लाख रुपैयाँ छ भने सर्वोत्तम सिमेन्टको ९ करोड ५७ लाख रुपैया कुल बक्यौता छ ।
पहिलो किस्ता तिरेका उद्योगीहरुले दोस्रो किस्ता पनि तिर्न थालेका हुन् । नेपाल विद्युत प्राधिकरणले डेडिकेटेड फिडर तथा ट्रंकलाइन प्रयोग गरेर पहिलो किस्ता तिरेका उद्योगीहरुलाई दोस्रो किस्ता तिर्न आग्रह गरेको थियो । गएको मंगलबारदेखि प्राधिकरणका वितरण केन्द्रहरुले उद्योगीहरुलाई पत्राचार गरेर दोस्रो किस्ता तिर्न आउन आग्रह गर्न थालेका थिए ।
प्राधिकरणले सूचना निकालेर बक्यौता तिर्न कार्तिक २ गतेसम्मको समय दिएको थियो । जसमा १३ वटा उद्योगले लाइन काटिने भएपछि बक्यौता तिर्न थालेका थिए । अब २५ उद्योगले बक्यौताको पहिलो तिर्न बाँकी थियो । ती सबै उद्योगमा लाइन काटिएको थियो । पहिलो किस्ता तिर्न तयार भएपछि सबै उद्योगमा लाइन जोडिएको थियो । कार्तिक तेस्रो साता सबै उद्योगमा लाइन जोडिएको थियो ।
प्राधिकरणले कुल बक्यौता २८ किस्तामा तिर्न उद्योगीहरुलाई सुविधा दिएको छ ।
प्राधिकरणका अनुसार हुलास स्टील पहिलो र दोस्रो किस्ता तिर्ने पहिलो उद्योग हो ।
लामो समयदेखि उद्योगी र विद्युत प्राधिकरणबीच विवादका रुपमा रहेको डेडिकेटेड ट्रंकलाइन समाधानतिर गएको छ । उद्योगीहरुले बक्यौता तिर्न थालेसंगै समाधानतिर गएको हो ।
दोस्रो किस्ता समेत तिर्न थालेकाले अब कुनै विवाद नरहेको प्राधिकरणका कर्मचारीहरुको भनाई छ । उनीहरुका अनुसार अरु कम्पनीहरु पनि दोस्रो किस्ता तिर्न तयार छन् ।
सच्याइएको *
