नेपाल पूर्वाधार 
एजेन्सी। थाइल्यान्डको संवैधानिक अदालतले शुक्रबार प्रधानमन्त्री पेटोङटार्न शिनावात्रालाई पदमुक्त गर्ने फैसला गरेको छ । क्याम्बोडियाका पूर्वप्रधानमन्त्री हुन सेनसँग भएको विवादास्पद फोन वार्ताले नैतिक मापदण्ड उल्लघंन गरेको ठहर गर्दै अदालतले उनको कार्यकाल अन्त्य गरिदिएको हो ।
२०२४ अगस्टमा थाइल्यान्डको इतिहासकै कान्छी प्रधानमन्त्री बनेकी पेटोङटार्न केवल एक वर्षमै पदच्युत भएकी छन् । अदालतले उनलाई ‘संविधानअनुसार अयोग्य र निषेधित विशेषता बोकेको’ ठहर गरेको हो ।
गत जुन १५ मा क्याम्बोडियासँगको सीमा तनाव बढिरहेको बेला उनले हुन सेनलाई ‘काका’ सम्बोधन गर्दै आफ्नै सेनाको कदममाथि आलोचना गरेको र “जे चाहिन्छ भन्नुहोस्, म मिलाइदिन्छु” भन्ने भनाइले राष्ट्रिय हितसमेत प्रभावित भएको ठहर गरियो ।
उक्त वार्ताको अडियो प्रमाणित भएपछि थाइल्यान्डमा तीव्र राष्ट्रवादी प्रतिक्रिया आएको थियो । केही हप्तापछि दुई देशबीच पाँच दिनसम्म सशस्त्र झडप हुँदा कम्तीमा ३८ जनाको मृत्यु भएको र हजारौँ नागरिक विस्थापित भएका थिए ।
निर्णयपछि पैतोंग्तानले पत्रकार सम्मेलन गर्दै “अदालतको यो निर्णयले फेरि एक पटक अचानक राजनीतिक परिवर्तन ल्याएको छ” भन्दै राष्ट्र, धर्म र राजाप्रति आफ्नो प्रेम प्रकट गरिन् ।
थाइल्यान्डमा पछिल्लो दुई दशकयता अदालत र सेनाले पटक–पटक शिनावात्रा परिवारसँग जोडिएका नेताहरूलाई पदमुक्त गर्दै आएका छन् । उनका पिता थाक्सिन, काकी यिङलक र काका सोम्चाईसमेत अदालत वा सेनाको निर्णयले पद गुमाइसकेका थिए।
यो निर्णयसँगै सत्तारूढ फिउ थाई पार्टी फेरि नेतृत्व संकटमा परेको छ, जसले देशलाई अर्को राजनीतिक अनिश्चिततामा धकेलेको छ ।
