नेपाल पूर्वाधार 
काठमाडौं । आज देशभरका विभिन्न राजमार्ग पहिरो र बाढीका कारण अवरुद्ध रहेका छन् ।
नेपाल प्रहरीले बिहीबार बिहान जारी गरेको सूचनाअनुसार धनकुटा, सिन्धुपाल्चोक, काभ्रे, चितवन, नवलपरासी (बर्दघाट सुस्ता पूर्व), म्याग्दी, गुल्मी, जुम्ला र डोल्पाका विभिन्न राजमार्ग अवरुद्ध रहेका छन् ।
धनकुटाको साँगुरिगढी गाउँपालिका वडा नम्बर पाँच क्षेत्रमा पहिरोका कारण रवि राके भेडेटार सडक अवरुद्ध रहेको छ । उक्त सडक एकतर्फी रुपमा सुचारु रहेको छ ।
त्यस्तै, सिन्धुपाल्चोक जिल्लाको अरनिको राजमार्गअन्तर्गत भोटेकोशी गाउँपालिका २ नम्बर वडाको कोदारी, कोल्पाङ र ३ नम्बर वडाको लार्चा क्षेत्रमा पहिरोका कारण बाटो पूर्ण रुपमा अवरुद्ध रहेको छ ।
त्यस्तै, काभ्रेको धुलिखेल नगरपालिका ११ बाँझोखेल क्षेत्रमा बि.पि. राजमार्ग सडक खण्ड एकतर्फी रुपमा सुचारु रहेको छ ।
त्यस्तै, नवलपरासी (बर्दघाट सुस्ता पूर्व) मा बिनयी त्रिवेणी गाउँपालिका १ अन्तर्गत महेन्द्र राजमार्ग बाढीका कारण पूर्ण रुपमा अवरुद्ध रहेको छ भने म्याग्दीको अन्नपुर्ण गाउँपालिका रुप्से क्षेत्रको बेनी-जोमसोम सडक खण्ड पनि पहिरोका कारण पुर्ण रुपमा अवरुद्ध रहेको छ ।
साथै, डोल्पाको भेरि करिडोर अन्त्रगत त्रिपुरा सुन्द्री नगरपालिका छलघाटको सडकखण्ड पनि बाढीका कारण पुर्ण रुपमा अवरुद्ध रहेको छ ।
