नेपाल पूर्वाधार 
काठमाडौं । नेपाल विद्युत प्राधिकरणले लोडसेडिङको समयमा डेडिकेटेड फिडर र ट्रंक लाइनबाट विद्युत सेवा उपयाेग गरेका उद्योगहरूकाे टिओडी मिटरको डाटासहितको प्रमाण संसदकाे सार्वजनिक लेखा समितिमा पेश गरेकाे छ । प्राधिकरणाले बिहीबार साँझ डेडिकेटेड फिडर र ट्रंक लाइनसँग सम्बन्धित सम्पूर्ण विवरण सहितकाे प्रमाण लेखा समितिलाई बुझाएकाे हाे ।
प्राधिकरणले टिओडी मिटरको डाटा, विभिन्न समितिको अध्ययन प्रतिवेदन, अदालतबाट भएकाे फैसलाकाे विवरण पेश गरेकाे समितिका सचिव एकराम गिरीले बताए । उनका अनुसार अब समितिले प्राधिकरणबाट प्राप्त सम्पूर्ण विवरणकाे अध्ययन गर्नेछ ।
यता प्राधिकरणले पनि डेडिकेटेड फिडर र ट्रंक लाइनबाट विद्युत सेवा उपयाेग गरेका ६१ उद्याेगकाे सूची तथा एम-पावर लेजर समेटिएकाे एउटा, प्राधिकरणका तत्कालिन सञ्चालक मनाेज मिश्र र भक्तबहादुर पुनले तयार पारेकाे प्रतिवेदनकाे एक प्रति, टिओडी मिटर लाउनलाेडकाे एक पाेका समितिमा पेश गरेकाे जनाएकाे छ ।
यस्तै, लाेड प्राेफाइल सहितकाे टिओडी मिटर डाटा लाउनलाेडकाे ३ पाेका, लगसिट २२ पाेका, अदालतबाट भएकाे फैसलाकाे एक पाेका र २०७२ माघदेखि २०७५ बैशाखसम्मकाे बक्याैता महसुल सम्बन्धि बिल तथा विवरण पेश गरेकाे पनि प्राधिकरणाले जनाएकाे छ ।
प्राधिकरणले पेश गरेकाे सम्पूर्ण विवरणसहितकाे प्रमाण ७० हजार पेजको हाराहारीमा बुझिएकाे छ । गत शुक्रबारकाे समितिकाे बैठकले प्राधिकरणलाई टिओडी मिटरको तथ्यांक उपलब्ध गराउन निर्देशन दिएको थियो।
