नेपाल पूर्वाधार 
काठमाडौं । सरकारले देवेन्द्र कार्की तथा महेन्द्रबहादुर गुरुङलाई नेपाल विद्युत प्राधिकरण सञ्चालक समिति सदस्यमा नियुक्त गरेको छ । ऊर्जा, जलस्रोत तथा सिँचाइ मन्त्रालयले मन्त्री स्तरीय निर्णय गरी रिक्त सञ्चालक समितिमा कार्की र गुरुङलाई नियुक्त गरेको हो ।
मन्त्रालयले यसअघि सञ्चालक समितिमा रहेका सदस्य द्वय कपिल आचार्य र भक्तबहादुर पुनलाई हटाएर कार्की र गुरुङलाई सञ्चालक समिति सदस्य बनाएको हो ।
सञ्चालकमा नियुक्त भएका कार्की ऊर्जा मन्त्रालयका पूर्वसचिव हुन् । गुरुङ विद्युत विकास विभागका पूर्वमहानिर्देशक तथा पञ्चेश्वर विकास प्राधिकरणका पूर्व प्रमुख कार्यकारी अधिकृत हुन् । उनीहरु दुवैसँग ऊर्जा क्षेत्रमा लामो समयसम्म काम गरेको अनुभव छ ।
आचार्य र पुनले डेडिकेटेड र ट्रंक लाइनको विद्युत महसुल बक्यौता असुल हुने सुनिश्चित नभई विद्युत लाइन जोड्न नहुँने मत प्राधिकरण सञ्चालक समितिको बैठकमा राखेका थिए ।
यही कारण, उनीहरुसँग ऊर्जामन्त्री दीपक खड्काले स्पष्टीकरण मागेका थिए । मन्त्री खड्काले उनीहरूले पेस गरेको स्पष्टीकरण चित्तबुझ्दो नभएको भन्दै गत साउन १८ गते आचार्य र पुनलाई प्राधिकरणको सञ्चालक समिति सदस्यबाट बर्खास्त गरेका थिए ।
विद्युत प्राधिकरणको सञ्चालक समिति बैठकले गत साउन ७ गते लाइन काटिएका ६ उद्योगमा विद्युत आपूर्ति सुचारु गर्ने निर्णय गरी त्यही राति लाइन जोडेको थियो । यही दिनको बैठकमा आचार्य र पुनले उद्योगीको विद्युत लाइन जोड्ने सम्बन्धमा फरक मत राखेका थिए ।
