नेपाल पूर्वाधार 
काठमाडाैं । नेपाल विद्युत प्राधिकरणले डेडिकेटेड फिडर र ट्रंक लाइन विवादमा परेका ६ वटा उद्योगकाे काटिएको विद्युत लाइन जाेड्ने भएकाे छ । विद्युत नियमन आयाेगकाे निर्देशन बमाेजिम प्राधिकरण सञ्चालक समितिले मंगलबार साँझबाट क्रमशः सबै उद्याेगकाे विद्युत आपूर्ति सुचारु गर्ने निर्णय गरेकाे हाे ।
डेडिकेटेड फिडर र ट्रंक लाइनकाे महसुल ३ महिनाभित्र विद्युत महसुलकाे बाँकी बक्याैता भुक्तानी गर्नुपर्ने र नगरेकाे खण्डमा पुनः लाइन काट्ने गरी साँझबाटै उद्याेगमा लाइन जाेड्ने निर्णय भएकाे प्राधिकरणले जनाएकाे छ ।
डेडिकेटेड फिडर र ट्रंक लाइन महसुल विवादमा प्राधिकरणले गत असार २५ गतेदेखि रिलायन्स स्पिनिङ मिल, घोराही सिमेन्ट, अर्घाखाँची सिमेन्ट, जगदम्बा स्टिल, जगदम्बा सेन्थेटिक र हुलास स्टिल गरी ६ उद्योगको लाइन काटेको थियो ।
प्राधिकरण बोर्डले गरेको निर्णयमा सञ्चालकद्वय भक्तबहादुर पुन र कपिल आचार्यले भने फरक मत राखेको एक सदस्यले जानकारी दिए । उनीहरूले विद्युत् महसुल उठ्ने ग्यारेन्टी नभई काटिएको लाइन जोड्न नहुने मत राखेको स्रोतले बतायो ।
बोर्ड बैठकको निर्णय :
प्राधिकरणले लाइन काटेर उद्याेगलाई डेडिकेटेड फिडर र ट्रंक लाइनकाे विद्युत महसुल बक्याैता तिर्न ताकेता गर्दै आएकाे थियाे । प्रधानमन्त्री केपी शर्मा ओलीले गत शुक्रबार सबै उद्याेगकाे लाइन जाेड्न निर्देशन दिएका थिए ।
यस्तै, आइतबार विद्युत् नियमन आयोगले पनि विवाद कायमै रहेको बखत लाइन काट्न नमिल्ने कानुनी व्यवस्था रहेको कारण देखाउँदै उद्याेगमा विद्युत आपूर्ति सुचारु गराउन प्राधिकरणलाई लिखित निर्देशन दिएको थियो । सबैतिरबाट लाइन जाेड्न दवाब बढेपछि प्राधिकरण उद्याेगमा विद्युत आपूर्ति सुचारु गर्ने निर्णयमा पुगेकाे हाे ।
