नेपाल पूर्वाधार 
रसुवा । रसुवाकाे हाकुमा निर्माणाधीन २१६ मेगावाटकाे माथिल्लो त्रिशूली–१ जलविद्युत् आयोजना ३५ प्रतिशत पूरा भएकाे छ । नेपाल वाटर एन्ड इनर्जी कम्पनीले निर्माण गरिरहेकाे आयाेजनाकाे सबै संरचनाकाे यति भाैतिक प्रगति भएकाे हाे ।
आमा छोदिङ्मो र उत्तरगया गाउँपालिकाको आधार इलाकाभित्र निर्माण भइरहेको याे आयोजना जिल्लाकै सबैभन्दा ठूलो आयोजना हो । सन् २०१९ देखि निर्माण सुरु भएको याे आयोजनाको मुख्य सुरुङ खन्ने काम ६५ प्रतिशत सकिएको छ ।
विद्युतगृह तथा ट्रान्सफर्मर राख्ने स्थलको भूमिगत संरचना निर्माणकाे काम धमाधम भइरहेकाे आयाेजनाले जनाएकाे छ । आयाेजनाकाे मुख्य सुरुङको बाँकी काम अबकाे एक वर्षभित्र सम्पन्न गर्ने लक्ष्य छ ।
धुञ्चेको त्रिशूली दोभान तथा भोटेकोशी सङ्गमस्थलमा बाँध बाँधी छ मिटर गोलाइको ९.४९१ किलाेमिटर मुख्य सुरुङको सहायताबाट त्रिशूली नदीको ७६ क्युसेक पानी मैलुङ दोभानमा पु-याई ३ वटा टर्वाइनबाट २१६ मेगावाट विद्युत् उत्पादन गरिनेछ ।
सन् २०२६ को डिसेम्बरभित्र सम्पन्न गर्ने लक्ष्यका साथ काम भइरहेको जलविद्युत् आयोजनाका सहायक प्रबन्धक विप्लव खड्काले जानकारी दिए । सम्पूर्ण संरचना भूमिगत रहने भएका कारण बाढीपहिरो, भूक्षय, चट्याङ तथा भूकम्पले असर नगर्ने वातावरण विज्ञ मधु पाण्डेले बताए । आयोजना निर्माणको क्रममा वातावरणलाई कुनै असर नपारिएको प्राविधिकहरुले बताएका छन् ।
आयोजना निर्माण सम्पन्न गर्न करिब ७० देखि ८० अर्ब लागत लाग्ने र निर्माण सम्पन्न भएको ३० वर्ष पछि स्वतः नेपाल सरकारको हुने आयोजनाले जनाएको छ । राजधानी काठमाडौँबाट ३ घण्टाको दूरी उत्तरमा रहेको आयोजनास्थल बेत्रावती– स्याफ्रुबेँसी राजमार्गसँगै रहेका कारण निर्माण सामग्रीलगायत उपकरण ढुवानीमा सहज भएको आयोजनाले जनाएको छ ।
कोरिया एक्जिम, एसियाली विकास बैंकलगायत गरी विभिन्न नौ बैंक तथा दातृ संस्थाको सहुलियतपूर्ण कर्जा सहयोगमा निर्माणाधीन माथिल्लो त्रिशूली–१ जलविद्युत् आयोजनाको प्रभावित क्षेत्रमा वातावरणीय प्रभाव मूल्याङ्कन (इआईए)ले ओैँल्याएका र स्थानीयको आवश्यकतालाई प्राथमिकता दिइएको आयोजनाले जनाएको छ । याे आयोजनाले धुञ्चेस्थित रसुवा माविलाई विद्यार्थी छात्राबास , हाकुबेँसीमा पक्की पुल निर्माण गरेको छ । भूकम्प तथा कोभिड–१९को समयमा राहत एवं स्वास्थ्य क्षेत्रलाई सहयोग गरेको थियो ।
सुरक्षा निकाय अन्तर्गत नेपाल प्रहरीलाई हाकुमा सुरक्षा चौकी निमार्ण गर्न जग्गा प्रदान गरेको छ । आयोजनाका प्रबन्धक गिरीराज अधिकारीले कम्प्युटर, भाषा, कुक, सवारीसाधन चलाउने, सीपमुलक तालिमसमेत स्थानीयलाई प्रदान गरिएको बताए ।
