Nepal Purbadhar

बुधबार, मंसिर २१, २०७९
Wednesday, December 7, 2022

बुधबार, मंसिर २१, २०७९
Wednesday, December 7, 2022

धम्जाका महिलाको आम्दानीको स्रोत ‘होम–स्टे’


ढोरपाटन (रासस) : ४ वर्षअगाडि बागलुङको धम्जाका महिला घरायसी काममा तल्लीन हुन्थे । घरमा कोही नयाँ पाहुना आउँदा पनि बोल्न अप्ठ्यारो मान्थे । घाँस, दाउरा र मेलापात गरेरै जीविकोपार्जन गर्दै आएका महिलाहरूको दैनिकी अहिले फेरिएको छ । उनीहरूको दैनिकी मात्रै फेरिएको छैन, जीवनस्तर नै बदलिएको छ । काठेखोला गाउँपालिका-३ मा पर्ने धम्जा ओखले गाउँ पर्यटकीय हिसाबले निकै मनमोहक भएको हुँदा स्थानीयले २०७५ सालबाट घरबास (होम-स्टे) सञ्चालन गर्दै आएका छन्।

होम-स्टे सञ्चालनपछि यहाँका महिला स्वरोजगार बन्नुका साथै दैनिकी र जनजीवनसमेत परिवर्तन भएको छ । सुरुमा होम-स्टे सञ्चालन गर्न समस्या भयो ।तर, पछि जान्दै, बुझ्दै र सिक्दै गएपछि उनीहरूमा निकै परिवर्तन आएकाे छ  नयाँ मान्छे आउँदा बोल्न नसक्ने महिलाहरूले नेतृत्व विकास गरेर होम-स्टेमा आउने पाहुनाको व्यवस्थापन उनीहरू आफैँ गर्छन् । होम-स्टेमा खाना, बस्न र नाचगान गरेर मनोरञ्जन दिने कामसमेत हुँदै आएको छ ।

होम-स्टे सञ्चालक माया पुन घर्ती भन्छिन्, “होम–स्टे सञ्चालनमा आएपछि गाउँका आमा, दिदीबहिनीको चालचलन, बोलीचालीसँगै जीवनशैली पनि फेरिएको छ । पहिले चुलोचौकोमै सीमित हुने हामी महिला गाउँ समाजमा आफ्ना कुरा राख्न सक्दैनथ्यौँ । अहिले बोल्न सक्ने भएका छौँ । सुरु-सुरुमा त गाह्रो भयो। पाहुनाले भने जस्तो खानपान बनाउन सकिँदैन कि भन्ने हुन्थ्यो । अहिले धेरैले राम्रो भएको छ भन्खुदा सी लाग्छ । अझै सिक्ने क्रममा छौँ । जति सक्दो पाहुनालाई खुसी बनाउने प्रयास गरेका छौँ ।”

उनले होम-स्टेलाई व्यावसायिक रुपमा विकास गरिरहेको भन्दै व्यवस्थापनलाई थप व्यवस्थित गरिरहेको बताए । घरबास आफूहरूको आयस्रोतको माध्यम बन्नाका साथै गाउँको प्रचार–प्रसारसमेत भइरहेको उनकाे भनाइ छ ।

पर्यटकीय हिसाबले धम्जा ओखले गाउँले निकै सम्भावना बोके पनि ओझेलमा परेको हुँदा यसको विकास गर्न आफूहरु जुटिरहेको घर्ती बताउँछिन् ।  “होम–स्टे सञ्चालन भएपछि हाम्रो गाउँको प्रचार–प्रसार भइरहेको छ, पर्यटकीय सम्भावना बोकेको हाम्रो गाउँलाई विकास गर्नुपर्छ भन्ने लक्ष्य राखेर काम गरेका छौँ, गाउँका महिला दिदीबहिनी एकताबद्ध भएर लागेका छौँ, बिस्तारै व्यावसायिक बन्दै पनि छौँ”, घर्तीले भनिन् “होम–स्टेले गाउँलेलाई एकताबद्ध बनाउनुका साथै सामाजिक कार्यमा लाग्न प्रेरित गरेको छ ।”

स्थानीय पुस्पा छन्त्यालले होम-स्टेले महिलाको दैनिकी र जीवनशैलीमा परिवर्तन ल्याएको बताइन् । उनले गाउँ होम-स्टे सञ्चालन गर्नुपूर्व आफूहरूले घाँसदाउरा गर्ने, पशुचौपाया पाल्ने र मेलापात गरेर जीविका निर्वाह गरेको स्मरण गरिन् । घरबास महिलाको आयआर्जनको स्रोत बनिरहेको उनकाे भनाइ छ । उनी भन्छिन्, “पहिले हाम्रो दैनिकी घाँसदाउरा र मेलापात गर्दैमा बित्ने गर्थ्याे, अहिले मेलापातमा मात्रै सीमित हुन परेको छैन, घरमा पाहुनालाई परिकार बनाएर खुवाउने, हाम्रो कला संस्कृति देखाउने गरेर बित्छ, यसबाट आम्दानी राम्रो भएको छ ।”

छन्त्यालले होम-स्टे सञ्चालनमा आएको छोटो समयमै धेरै पर्यटक भित्र्याउन सफल भएको र आफ्ना गतिविधि र चालचलनमा परिवर्तन भएको बताइन् । उनले धेरैभन्दा धेरै पाहुना भित्र्याउने र उनीहरूलाई सन्तुष्ट बनाउने तथा स्थानीय गीतसङ्गीत र नाचले मनोरञ्जन दिन आफूहरू निरन्तर लागिपरेको बताइन् ।

“हाम्रा लागि होम–स्टे सञ्चालन गर्नु बिल्कुलै नयाँ काम हो, नयाँ अनुभव हो, हामीले गर्नुपर्ने र सिक्नुपर्ने काम धेरै छन्, केही कमीकमजोरी पाहुनाहरुले पनि औँल्याइदिनुहुन्छ, सुधार गरिरहेका छौँ”, छन्त्यालले भनिन्, “पाहुनाले हामीबाट केही नयाँ कुरा सिक्नुहुन्छ भने हामीले पनि उहाँहरूबाट नयाँ कुरा  सिकिरहेका छौँ, यसले यहाँ धेरै परिवर्तन हुँदै गएको छ ।”

गाउँलाई पर्यटकीय केन्द्रका रूपमा विकास गर्न र महिलालाई व्यवसायसँग जोड्न चार वर्षपहिले ‘बेलढुङ्गा सामुदायिक होम–स्टे’ स्थापना गरेको अध्यक्ष गोपाल श्रीसले बताए । पर्यटकीय क्षेत्र बेलढुङ्गाको काखमा रहेको धम्जा ओखले गाउँ सम्भावना बोकेको ठाउँ हुँदा आफूहरु सक्रिय रुपमा लागेको श्रीसले बताए ।

“हाम्रो उद्देश्य गाउँलाई पर्यटकीय क्षेत्र बनाउने र महिला दिदीबहिनीको नेतृत्व विकास गरी व्यावसायिक बनाउने थियो, चार वर्षमा दिदीबहिनीमा निकै परिवर्तन आएको छ, होम–स्टे राम्रै चलेको छ”, अध्यक्ष श्रीसले भने, “पहिले उहाँहरु राम्रोसँग बोल्न सक्नु हुँदैनथ्यो, नेतृत्व विकास भएको थिएन, अहिले निकै ‘फर्वाड’ हुनुभएको छ ।”

गाउँको १२ घरमा होम-स्टे सञ्चालनमा छ । होम-स्टे सञ्चालन गर्न हालसम्म १८ लाख अनुदान प्राप्त भएको छ । गण्डकी प्रदेश सरकारले सहयोग गरेको उक्त रकमबाट भान्साकोठा, शौचालय, सभा हल निर्माण गरिएको छ ।

“पाहुनाको आगमन राम्रो छ, बर्खामा अलिकति समस्या भयो, गाउँ आउने बाटो कच्ची हुँदा बर्खाभरि गाडी चल्दैनन्, त्यसले गर्दा पाहुना भित्र्याउन सकिएन, यस वर्षको बर्खामा दुईजना विदेशी पर्यटकलाई १० दिन राखियो, अरू बाटोका कारण आउन सक्नु भएन”, उनले भने, “बाटो राम्रो भएको बाह्रै महिना यहाँ पाहुना आउन सक्नुहुन्थ्यो ।”

उनले होम-स्टेमा आउने पाहुनलाई धम्जा ओखलेमा उत्पादन हुने कोदो, फापर र आलुबाट बनाइएका परिकार तथा स्थानीय कुखुरा, खसी बोका, गुन्द्रुक लगायतका स्वादिष्ट परिकार खुवाउने गरेको बताउँछिन् । होम-स्टे सञ्चालकले पाहुनालाई मनोरञ्जन दिन मौलिक सालैजो, ठाडो भाका लगायतका विभिन्न संस्कृतिको नाचसमेत देखाउने गरेको अध्यक्ष श्रीसको भनाइ छ । होम-स्टे नजिकै म्याग्दी र बागलुङको सिमानामा पर्ने पर्यटकीय क्षेत्र बेलढुङ्गा रहेको हुँदा यहाँ घुम्न आउने पर्यटकले एक रात यहाँ बिताउने गरेको उनकाे भनाइ छ ।


Read Previous

कात्तिकभित्रै मेलम्चीको पानी काठमाडाैं ल्याउने तयारी

Read Next

कोप-२७ मा नेपालकाे प्राथमिकतामा पर्वतीय मुद्दा

Leave a Reply

Your email address will not be published.